‘Bikoy’ hinatulang guilty sa perjury

MANILA, Philippines- Hinatulang guilty si Peter Joemel Advincula ng Manila court dalawang taon matapos maaresto sa salang perjury laban kay dating senatorial candidates Jose Manuel “Chel” Diokno at Lorenzo “Erin” Tañada, at dating Supreme Court spokesperson Theodore Te.

“The court finds accused Peter Joemel Advincula guilty beyond reasonable doubt of the crime of perjury,” saad sa desisyon ng Manila Metropolitan Trial Court Branch 17.

Ibinahagi ni Tañada ang kopya ng desisyon sa kanyang Twitter page nitong Miyerkules, kung saan makikita na ang parusa para sa indibidwal na kilala ring si  “Bikoy” ay “three months and one day of arresto mayor as minimum, up to one year and one day of prison correccional as maximum.”

Wala pang pahayag ang kampo ni Advincula hinggil sa hatol ng korte.

Matatandaang pinaratangan ni Advincula sina Diokno, Tañada, at dating Supreme Court spokesperson Theodore Te na bahagi ng “Project Sodoma” na umano’y planong pagpapatalsik kay dating Pangulong Rodrigo Duterte noong 2019.

Advertisement

Ani Advincula, nagkaroon umano ng pulong sa Ateneo de Manila University para talakayin ang plano, kung saan umano niya nakita ang tatlo.

Kinasuhan naman nila si Advincula ng perjury, at sinabing hindi sila nakipagkita rito.

Noong 2021, iginiit ng Department of Justice na kasinungalingan ang pahayag ni Advincula dahil sina Diokno at Tañada nasa unibersidad para sa isang event na may kinalaman sa senatorial elections. Nakipagkita lamang si Te kay Advincula matapos makatanggap ng mensahe na mayroong nangangailangan ng legal assistance.

Sinabi rin ni Advincula na siya ang nasa likod ng mga video na tinatawag na “Ang Totoong Narco list” kung saan sinasabing may kaugnayan ang pamilya Duterte sa illegal drug syndicates.

Kalaunan ay bianwi ito ni Advincula at itinuro ang oposisyon sa paggawa umano ng “script” ng mga alegasyon laban kay Duterte bilang parte ng “Project Sodoma” ouster plot. RNT/SA