BIR nagbabala sa taxpayers na may doble-dobleng TIN

MANILA, Philippines – Nagbabala ang Bureau of Internal Revenue (BIR) sa mga may-ari ng doble-dobleng tax identification numbers (TIN) na maaaring kaharapin ng mga ito ang criminal liability.

Sa pahayag nitong Martes, Mayo 23, nagpaalala ang BIR na sa ilalim ng batas, tanging isang TIN lamang ang nakatalaga sa isang taxpater, at ang pagkakaroon ng iba’t ibang TIN ay isang “serious offense” na maaaring humantong sa legal repercussions.

Ayon sa kagawaran, ang pagkakaroon ng mahigit sa isang TIN ay paglabag sa National Internal Revenue Code of 1997.

Ang mahuhuling lumalabag ay magmumulta ng P1,000 o pagkakulong ng hindi lalampas sa anim na buwan.

Maaari ring mahirapan na makapagsagawa ng pinansyal na transaksyon ang mga indibidwal na may mahigit sa isang TIN, katulad na lamang ng pagbubukas ng bank account o pag-aapply sa loan.

Ang TIN ay isang unique identifier na ibinibigay ng BIR sa bawat taxpayer.

Ayon sa BIR, ang indibidwal na nagkamali at nagkaroon ng TIN na higit sa isa ay maaaring magpasa ng BIR Form 1905 upang humiling ng kanselasyon ng ibang TIN nila sa Regional District Office kung saan ito nakarehistro.

“The BIR continuously reminds every taxpayer to be vigilant in keeping track of their TINs and ensuring that they are not duplicated. This will surely help maintain the integrity of the tax system and promote a fair and equitable tax environment,” ayon kay BIR Commissioner Romeo Lumagui Jr.

“The BIR has implemented measures to identify and prosecute individuals who violate the TIN provision.” RNT/JGC