MANILA, Philippines- Naglabas ang pamunuan ng Bureau of Customs (BOC) ng isang set ng panuntunan na bumabalangkas sa mga kondisyon para sa pagkuha ng preferential tariff treatment sa ilalim ng bagong ipinatupad na Regional Comprehensive Economic Partnership (RCEP) agreement.
Sa ilalim ng Customs Memorandum Order (CMO) No. 12-2023 na may petsang Mayo 26, 2023, ang mga imported na kalakal na nagmula sa alinman sa 15 miyembrong bansa ay karapat-dapat na i-claim ang preferential tariff rates na ibinigay ng RCEP.
Nabatid sa BOC na ang nasabing CMO ay nilagdaan ni Customs Commissioner Bienvenido Y. Rubio, at naging epektibo noong Hunyo 2, 2023. Ang CMO ay nagbigay din ng mga partikular na pamamaraan para sa pagpapalabas at pagtanggap ng “Certificate of Origin”.
Ang nasabing dokumento ay nagpapatunay sa bansang pinagmulan ng mga kalakal, na nagpapahintulot sa mga awtoridad sa customs, mga importer, at mga exporter na subaybayan ang paggalaw ng mga kalakal sa loob ng RCEP trading bloc.
Upang maging kuwalipikado para sa mga rate ng taripa ng RCEP, dapat makuha ng mga importer ang sertipikasyong ito kasama ng isang deklarasyon ng pinagmulan mula sa mga exporter na pinahintulutan ng Pilipinas, gaya ng tinukoy ng BOC.
Inatasan ng BOC ang Export Coordination Division (ECD) nito na suriin ang lahat ng isinumiteng certificate of origin at mga aplikasyon para sa Approved Exporter status.
“ECD shall carry out verifications of the originating status of the goods upon request of the RCEP importing party or based on risk analysis criteria. Verification can be made thru the documents requested from the exporter or producer or by inspections at the exporter’s or producer’s premises,” saad sa CMO.
Gayunpaman, nilinaw ng BOC na ang pinal na pagpapasiya sa rate of duty ay batay sa assessment ng mga isinumiteng dokumento mula sa mga importer.
Sa kabilang banda, ang mga exporter ay kinakailangang magsumite ng aplikasyon sa ECD para sa pagpapalabas ng Certificate of Origin para sa RCEP.
Ayon pa sa BOC, dapat isama sa aplikasyon ang lahat ng kinakailangang pansuportang dokumento, tulad ng deklarasyon sa pag-export, commercial invoice, bill ng landing/airway bill, at iba pang nauugnay na permit.
Layon ng RCEP ay alisin ang mga taripa sa hindi bababa sa 90 porsiyento ng mga kalakal sa pagitan ng mga miyembrong bansa.
“In cases where the RCEP preferential tariff rate is higher than the applied rate at the time of importation, the importer shall be allowed to apply for a refund of any excess duties and taxes paid for originating goods,” ayon sa BOC.
Ang RCEP agreement ay ipinatupad sa lahat ng mga bansang kasapi nito, na binubuo ng China, Japan, South Korea, New Zealand, Australia, at 10 Association of Southeast Asian Nations (ASEAN) na bansa, na kinabibilangan ng Pilipinas. JAY Reyes
