Bong Go nakiisa sa Araw ng Samar

MANILA, Philippines – Nakiisa si Senador Christopher “Bong” Go sa “Adlaw han Barangay 2023” bilang bahagi ng Pagdiriwang ng Araw ng Samar sa Catbalogan City at nagmarka ito ng isang masayang okasyon para sa lalawigan.

Sa ilalim ng temang “One People, One Samar: Sustaining Peace and Progress”, binigyang-diin ng senador kung paano ipinakita ng Samar ang isang pinag-isang pamayanan na “binibigkis ng ating ibinahaging pamana, kultura, at adhikain.”

Isa sa mga kapansin-pansing aspeto ng talumpati ng senador ay ang kanyang pangako na patuloy na susuportahan ang Pamahalaang Panlalawigan ng Samar at ang mga bahagi nitong local government units.

Binigyang-diin niya ang mga hakbang na lumikha ng pangmatagalang pagbabago para sa lahat ng Samareño, tulad ng Malasakit Program.

“Alam n’yo, parati ko kasing naririnig, ‘salamat Senador Bong Go’ sa mga proyekto, ‘salamat Pangulong Duterte sa mga tulong.’ Huwag po kayong magpasalamat sa amin. Kami po ang dapat magpasalamat sa inyo dahil binigyan n’yo kami ng pagkakataon na makapagserbisyo sa inyo,” ani Go.

“Kahit saang sulok kayo sa Pilipinas, pupuntahan ko kayo basta kaya ng aking katawan at panahon. Sanay ako sa trabaho. Umaga, tanghali, hapunan, kahit sa panaginip, nagtatrabaho ako,” idiniin niya.

Sinabi ni Go na mahalaga na maging accessible ang pangangalagang pangkalusugan sa pagsasabing ang lahat ng mamamayan ay dapat makatanggap ng tulong medikal na kailangan nila.

Ang ideya ni Go na programang Malasakit Centers ay na-institutionalize sa ilalim ng Republic Act No. 11463 na kanyang inakda at patuloy na itinataguyod.

Tinutulungan ng programa na tiyaking ang mga mahihirap na pasyente ay madaling makakukuha ng tulong medikal mula sa gobyerno.

Mayroon nang 158 Malasakit Centers sa buong bansa na nakapagsilbi na sa pitong milyong Pilipino, ayon sa Department of Health.

Sa lalawigan, isang Malasakit Center ang matatagpuan sa Samar Provincial Hospital sa Catbalogan City na binisita rin niya noong araw na iyon para magbigay ng ayuda sa mga pasyente at medical frontliners.

“Tutulong ako sa inyong ospital basta huwag ninyong pabayaan ang mga mahihirap nating kababayan, ‘yung mga helpless, hopeless nating kababayan na walang matakbuhan kung hindi tayo nasa gobyerno. Tulungan po natin sila,” giit ni Go.

Pinuri rin ni Go ang Tandaya Festival na kinikilala hindi lamang isang pagdiriwang ng mayamang kultura ng Samar kundi isang salamin ng pag-unlad at tagumpay ng komunidad.

“Ang bawat pagdiriwang, sayaw, musika – lahat ng ito ay nagkukuwento kung sino tayo at kung ano ang ating kayang marating bilang mga Samareños,” anang senador.

Dinaluhan ng 951 barangay captains, kinilala ni Go ang mahalagang papel ng barangay officials bilang frontliners sa paglilingkod sa bayan.

Nagbigay din siya ng suporta sa 2,000 barangay health workers na dumalo sa oath taking ng BHW Federation of Samar. Kasama niya sina BHW Partylist Rep. Natasha Co at Gov. Sharee Ann Tan na parehong nagbigay ng tulong sa mga BHW.

Sinamantala rin ni Go ang pagkakataon na kilalanin ang dedikadong serbisyo ng mga pangunahing lokal na opisyal na naging instrumento sa pag-unlad ng Samar. Nagpahayag siya ng pasasalamat kay Governor Sharee Ann Tan, Vice Governor Arnold Tan, Samar 1st District Representative Jimboy Tan, at Samar 2nd District Representative Michael Tan, Catbalogan Mayor Dexter Uy, at iba pa.

Sa kanyang pagbisita, unang pinangunahan ni Go ang inagurasyon at ribbon-cutting ng Tandaya Hall sa Catbalogan City kung saan kasama niya ang 24 Mayor at Vice Mayor at kanilang mga konsehal.

Nagsagawa rin siya ng inspeksyon sa lugar ng ilang mahahalagang proyekto sa pagpapaunlad na sinuportahan niya bilang Pangalawang Tagapangulo ng Komite sa Pananalapi ng Senado. Kabilang sa mga nasa ilalim ng konstruksyon ay ang New Catbalogan City Hall, isang bagong Sports Complex at ang Lagundi-San Andres Access Road.

Bukod sa mga proyektong ito, naging instrumento rin siya sa rehabilitasyon ng mga farm-to-market roads sa Basey, Marabut, Talalora at Tarangnan; paggawa ng farm-to-market road sa Pinabacdao; pagtatayo ng pampublikong pamilihan sa San Jorge, Talalora at Tarangnan; pagtatayo ng mga evacuation center sa Sta. Margarita at Zumarraga; pagtatayo ng seawall sa Sto. Niño; at pagkuha ng isang dump truck sa Jiabong.

Sa kanyang pangwakas na pananalita, nanawagan si Go sa lahat ng Samareño na igalang ang kanilang nakaraan, ipagdiwang ang kasalukuyan, at umasa sa hinaharap na puno ng pangako at pag-unlad. RNT