MANILA, Philippines – Kinikilala ang mahalagang papel na ginagampanan ng kalidad ng edukasyon sa pag-unlad ng mga indibidwal at lipunan sa kabuuan, muling iginiit ni Senador Christopher “Bong” Go ang kanyang pangako sa pagpapabuti ng sektor ng edukasyon sa bansa.
Sa isang ambush interview matapos personal na tulungan ang mga mahihirap na pamilya sa Pili, Camarines Sur, hinimok ni Go ang kabataan na magsikap para sa academic excellence dahil sila ang kinabukasan ng bansa.
“Priority rin po ang education. Alam n’yo, diyan po manggagaling ang lahat. Pinaka-basic natin kumbaga,” sabi ni Go.
“Parati kong ineengganyo ang kabataan, mag-aral kayong mabuti, kayo po ang kinabukasan ng bayang ito. At iyan po ang puhunan natin. Dala-dala na po natin ‘yan habambuhay, ang edukasyon. Kaya dapat din tutukan natin ang edukasyon,” idinagdag niya.
Sinabi ni Go na walang patid ang kanyang suporta para sa mga hakbangin sa edukasyon at idiniin na dapat unahin ang edukasyon sa mga alokasyon sa badyet.
Alinsunod sa kanyang pananaw na mapabuti ang sistema ng edukasyon sa bansa, inihain ni Go ang Senate Bill No. 1864 o ang “Student Loan Payment Moratorium During Disasters and Emergencies Act.” Layon ng panukala na ipagpaliban ang mga koleksyon sa pautang sa mga mag-aaral sa rasonableng panahon, bago at matapos ang mga sakuna at iba pang emerhensiya.
Inihain din niya ang Senate Bill No. 1964 o ang “Kabalikat sa Pagtuturo Act” na layong i-institutionalize ang allowance para sa gamit sa pagtuturo ng mga guro sa pampublikong paaralan. Ang panukala ay naipasa na sa huling pagbasa sa Senado.
Naghain din ang senador ng SBN 1359 o ang “No Permit, No Exam Prohibition Act” na layong parusahan ang pagpapatupad ng mga patakaran tulad ng “no permit, no exam” na pumipigil sa mga mag-aaral na kumuha ng eksaminasyon o katulad na pagsusuri dahil sa hindi bayad na matrikula o iba pang bayarin sa paaralan.
May papel din si Go sa pagpapalawak ng saklaw ng subsidy sa tertiary education sa pamamagitan ng co-authoring at co-sponsoring ng SBN 1360.
Ang panukalang batas na ito ay naglalayong amyendahan ang Republic Act No. 10931, kilala bilang Universal Access to Quality Tertiary Education Act.
Bilang karagdagan, ipinakilala rin ni Go ang SBN 1190, na magpapalawak sa mga layunin at aplikasyon ng Special Education Fund.
Sa ilalim ng panukalang batas na ito, ang SEF ay maaaring gamitin sa pagpapatakbo at pagpapanatili ng mga pampublikong paaralan, pagbabayad ng mga suweldo at benepisyo sa pagtuturo at non-teaching personnel, competency training para sa mga tauhan ng pagtuturo, pagpapatakbo ng Alternative Learning System, at educational research, bukod sa iba pa.
Isinulong din ng senador ang SBN 1786 na tutugon sa mga isyu sa kalusugan ng isip sa mga private higher education institutions.
Ang panukalang ito ay nag-uutos sa mga PHEI na magtatag ng Mental Health Office, kumuha at magsanay ng karagdagang mga tauhan sa mental health service personnel sa loob ng mga institusyon. RNT
