LAUSANNE — Si Justin Brownlee, na pinangunahan ang Pilipinas na manalo ng kanilang unang Asian Games basketball gold mula noong 1962, ay bumagsak sa doping test, ayon sa mga opisyal.
Ipinanganak sa Amerika, si Brownlee ay nagpositibo para ipinagbabawal na Carboxy-THC, sinabi ng International Testing Agency (ITA) na nakabase sa Lausanne.
Ang Carboxy-THC ay naka-link sa paggamit ng cannabis.”
Ang sample ay kinolekta ng ITA sa Asian Games Hangzhou 2022 sa panahon ng in-competition na anti-doping control na isinagawa noong 7 Oktubre 2023,” sabi ng ITA.
“Naipaalam na sa atleta ang kaso. Siya ay may karapatang humiling ng pagsusuri sa mga B-sample.”Sinabi rin ng ITA na ang basketball player ng Jordan na si Sami Bzai ay nagpositibo sa isang ipinagbabawal na steroid.
May karapatan din siyang humiling ng pagsusuri sa mga B-sample.Aabot sa 10 ang kabuuang bilang ng mga kilalang kaso ng doping sa Mga Laro.
Tinalo ng Pilipinas ang Jordan 70-60 sa men’s basketball final noong Oktubre 6 kung saan nagbuhos si Brownlee ng 20 puntos at humakot ng 10 rebounds. Natapos ang Palaro noong Linggo.Matapos ang 61 taon, naiuwi ng Pilipinas ang gintong medalya sa men’s basketball mula sa Asian Games.
Ang huling pagkakataon na nanalo ang pambansang koponan ng gintong medalya sa Asian Games ay noong 1962, nang talunin nito ang China para makuha ang ikaapat na sunod na korona sa continental tournament.
Ito rin ang unang pagkakataon na naabot ng Pilipinas ang gold medal match mula nang manalo ng silver medal noong 1990, at ang unang semifinal appearance ng bansa mula nang matapos ang ika-apat na pwesto noong 2002 edition sa Busan, South Korea.
Bago tinalo ng Gilas ang Jordan sa gold-medal match, pinangunahan ni Brownlee ang Philippine national basketball team laban sa powerhouse China sa kanilang semifinal game, 77-76.
Malaki rin ang naging papel ni Brownlee nang talunin ng Gilas ang Iran, 84-83.
Bumuga siya ng 36 puntos, 16 sa mga ito ay ibinagsak niya sa unang quarter, na may walong rebounds at apat na assists.
Ang Gilas Pilipinas ay dumanas ng fourth quarter collapse ngunit sa huli ay nagwagi nang makatakas ito sa Iran, 84-83, para makabalik sa semifinals ng Asian Games sa unang pagkakataon mula noong 2002 noong Martes sa Hangzhou, China.
Nilagdaan ni Pangulong Ferdinand “Bongbong” Marcos Jr. ang batas na nagbibigay ng pagkamamamayang Pilipino kay Brownlee noong Enero 2023.Nanumpa ng katapatan si Brownlee sa bansa noong Enero 16.
Bago pumasok sa Gilas Pilipinas, naglaro siya bilang import sa Philippine Basketball Association para sa crowd-favorite na Barangay Ginebra Gin Kings, kung saan napanalunan niya ang ilang mga kampeonato.RCN
