Cambodian nilamon ng 40 buwaya

PHNOM PENH, Cambodia – Nilamon ng humigit-kumulang 40 buwaya ang isang lalaking Cambodian matapos itong mahulog sa kanilang kulungan sa reptile farm ng kanyang pamilya, sabi ng pulisya.

Si Luan Nam, 72, ay nagsisikap na alisin ang isang buwaya mula sa isang hawla kung saan ito nangitlog nang hatakin ng buwaya ang patpat na hawak nito at nasama siya.

Matapos nito, nagtulong-tulong ang mga buwaya para sagpangin si Nam.

Lasog-lasog ang katawan ng biktima kung saan nilamon pa ng buo ang isang kamay nito.

Si Luan Nam ay ang presidente ng lokal na asosasyon ng mga crocodile farmers.

Isang dalawang taong gulang na batang babae ang pinatay at kinain ng mga buwaya noong 2019 nang gumala siya sa reptile farm ng kanyang pamilya sa parehong nayon, sabi ng hepe ng pulisya. RNT