MANILA, Philippines – Pinayuhan ng Catholic Bishops’ Conference of the Philippines Episcopal Commission on Catechesis and Catholic Education ang mga first time job seekers na huwag mawalan ng pag-asa.
Sa mensahe ni San Fernando La Union Bishop Daniel Presto – Vice-chairman ng CBCP- Episcopal Commission on Catechesis and Catholic Education, batid niyang marami ang nahihirapang makahanap ng trabaho kaya’t hinikayat nito ang mga magsisipagtapos na dagdagan ang mga kasanayan.
Inihalimbawa ng Obispo ang pagsusulit sa Civil Service Commission at pagkamit ng Technical Education and Skills Development Authority certifications.
“Kung sakali na matanggap na o makatanggap na ng trabaho ay dapat mahalin ang trabaho, mahalin, huwag magpapabaya sapagkat marami ang naghahanap rin, mahalin ito,” ayon pa ng mensahe ng Obispo.
Sa bahagi ng pamahalaan, unang nilagdaan ng Department of Labor and Employment ang mga rules and regulation ng First Time Jobseekers Assistance Act Inter-Agency Monitoring Committee (FTJAA-IAMC).
Sa ilalim nito, libreng makukuha ng mga first time jobseekers ang mga requirements na kinakailangan o hinihingi ng kanilang mga employer kung saan inaasahan na makakatipid sila ng hanggang dalawang libong piso. Jocelyn Tabangcura-Domenden
