COVID-19 admissions sa private hospitals, tumaas – PHAPI

MANILA, Philippines- Tumaas ang bilang ng admission ng kaso ng COVID-19 sa mga pribadong ospital sa nakalipas na tatlong araw sabi ni Private Hospitals Association of the Philippines, Inc. (PHAPI) president Dr. Jose Rene de Grano sa public briefing.

Ayon kay de Grano, ang dating utilization rate ng COVID-19 space sa mga ospital ay humigit-kumulang 20%. Ngayon, ang rate ng paggamit ng mga pasilidad ng COVID-19 ay higit sa 20% hanggang 50%, depende sa mga COVID-19 na kama na inilaan ng ospital.

Karamihan sa mga kasong ito ay na-admit sa ospital dahil sa ibang sakit ngunit nang sumailalim sa test at screening ay naging positibo sa COVID-19 .

Ang mga lugar na may pagtaas ng kaso ng COVID-19 sa mga pribadong ospital ay sa National Capital Region, Calabarzon, Western Visayas, at Davao Region, ayon kay de Grano.

Pinaalalahanan naman nito ang publiko na ang pagpunta sa ospital ay ligtas pa rin dahil ang kanilang COVID-19 facilities ay nakahiwalay at ang health protocols ay sinusunod.

Nitong Martes, naitala ng Department of Health ang 1,088 bagong kaso habang ang active tally ay bumaba sa 15,229. Jocelyn Tabangcura-Domenden