COVID-19 positivity, healthcare utilization rate sumisirit

MANILA, Philippines – Nagbabala ang OCTA Research ukol sa pagtaas ng mga kaso ng COVID-19 sa Pilipinas, kung saan ang paglago ay naitala sa positivity rate at ang average na growth rate sa buong bansa.

Saad sa datos na inanalisa ng grupo na ang positivity rate ng bansa ay kasalukuyang nasa 24.3%, habang ang pitong araw na average growth rate ay tumaas ng 3%.

Habang ang Metro Manila ay ang nakapagtala ng pinakamabilis na positivity rate na 25.8%, habang ang pitong araw na average growth rate nito ay bumaba ng 5% noong Mayo 13 hanggang 20, 2023. Ang rate ng paggamit nito sa healthcare ay nasa 30.5%, habang ang intensive care unit bed ang occupancy rate ay 27%.

“May mga provinces na pataas pa lang… May mga areas sa Calabarzon na sumasabay sa Metro Manila, but I think usually marami pang provinces na may nakikita pa tayong pagtaas ng cases and ng positivity rate,” ani OCTA Research Fellow Dr. Guido David.

“Pakonti-konti lang. It’s not as ‘yung tinatawag natin na madaling tumataas, hindi kagaya before na in two or three days talagang ang bilis ng pag-akyat,” ayon naman kay San Lazaro Hospital Infectious Disease Unit Head Dr. Rontgene Solante.

Mayroon ding 10 kaso ng COVID-19 sa Lung Center of the Philippines na kasalukuyang mayroong 16 na COVID-dedicated bed. RNT