DA: 95% ng rice retailers, tumalima sa price caps

MANILA, Philippines- Sinabi ng Department of Agriculture (DA) na karamihan sa rice retailers ay sumunod sa government-mandated price ceilings sa regular at well-milled rice varieties.

“So far, as of yesterday, nagkaroon tayo ng 95% na success rate,” ayon kay DA deputy spokesperson Wiann Angsiy.

“This means na nag-comply po ang ating mga retailers,” ayon kay Angsiy.

Nauna rito, inaprubahan ni Pangulong Ferdinand Marcos Jr. ang “mandated price ceilings” sa presyo ng regular milled rice at well-milled rice — pero lagpas doble pa rin ito sa ipinangako niyang P20 kada kilo noong panahon ng kampanya.

Bahagi ito ng Executive Order 39 na pinirmahan ni Executive Secretary Lucas Bersamin matapos irekomenda kay Pangulong Marcos ang pagkontrol ng presyo sa buong bansa para maging mas abot-kaya ito sa mga Pinoy kasabay ng pagsirit nito sa merkado.

Dahil dito, inuutos na hindi maaaring lumagpas sa sumusunod na presyo ang mga naturang uri ng bigas:

• regular milled rice: P41/kilo

• well-milled rice: P45/kilo

Gayunman, nagpahayag naman ng pangamba ang retailers na hindi malayong mapipilitan silang isara ang kanilang mga tindahan. Idinahilan ang pagkalugi kapag napilitan silang magbenta ng kanilang stocks sa mababang halaga.

“Even if may mga umaalma, patuloy pa rin tayong nagdi-disseminate ng information para ma-explain sa kanila na talaga pong importanteng sumunod dito sa price cap,” ayon kay Angsiy.

Ani Angsiy, ang retailers na susunod sa price cap ay makatatanggap ngcash aid mula sa gobyerno

“Mabibigyan natin sila ng ayuda basta po ay sumunod lamang sila,” aniya pa rin. Kris Jose