Digong iminungkahi na gawing anti-drug czar

MANILA, Philippines- Pinalutang ni Senador Bong Go nitong Martes ang ideya na gawing anti-drug czar ng administrasyon si dating Pangulong Rodrigo Duterte, na naglunsad ng drug war noon.

Sa ginanap na pagdinig ng Senate Committee on Public Order and Dangerous Drugs sa P6.7 billion shabu haul sa Maynila noong nakaraang taon, tinanong ni Go si Philippine National Police (PNP) Chief Police General Benjamin Acorda kung naisip nitong makatutulong ba si Duterte kung maitatalaga itong bilang anti-drug czar.

“Kung saka sakali lang…prerogative naman ‘yan ng Presidente, ang appointing authority, kung saka sakali lang, makakatulong ba kung itatalagang drug czar si dating Pangulong Duterte?” tanong ni Go kay Acorda.

Bilang tugon, sinabi ni Acorda na kanyang susuportahan ang anumang hakbang na makatutulong sa kampanya ng gobyerno laban sa illegal drugs.

“I don’t know if I can comment on that kung ano ang magiging setup [what the setup would be], but anything on the campaign against illegal drugs, I will be supportive,” ayon sa PNP chief.

Itinanong ito ni Go matapos mabahala sa masasayang ang pagkilos ng Duterte administrasyon dahil sangkot pala ang ibang miyembro ng pulisya sa “recycling” ng kumpiskadong droga.

“Wag nating sayangin ang naumpisahan ni dating Pangulo Duterte na labanan ang iligal na droga. Kapag bumalik ang iligal na droga, alam na natin na babalik ang kriminalidad at babalik ang korupsyon,” giit ni Go kay Acorda.

Ikinalungkot din ni Panel chairman Senator Ronald “Bato” dela Rosa, na nagsilbing chief PNP sa drug war ng administrasyong Duterte, ang pangyayaring sangkot ang pulis sa droga.

Binanggit din ni Bato na umabot ang madugong drug war sa International Criminal Court (ICC).

“Ang kinakasama ng loob ko sa inyo, makinig kayong lahat mga pulis, ako umaabot na ‘yung kaso ko sa ICC dahil sa paglalaban natin sa droga dahil sa ating war on drugs. Tapos kayo pala, pera pera ang iniisip ninyo. Kayo pa ang pasok sa sindikato. Hindi ko masikmura kung ganito ang nangyayari sa kapulisan, sumasama sa sindikato,” giit ni dela Rosa. Ernie Reyes