DOH: 6.9M chikiting, nabakunan kontra tigdas, rubella, polio

MANILA, Philippines- Nasa 6.9 milyong bata ang nabakunahan laban sa tigdas, rubella at polio sa ilalim ng kampanya ng gobyerno na “Chikiting Ligtas 2023,” ayon sa Department of Health (DOH).

Naglunsad ng isang buwang nationwide supplement immunization campaign ang DOH para mabakunahan ang mga kabataan laban sa vaccine-preventable diseases.

Nitong Martes, sinabi ni DOH officer-in-charge Maria Rosario Vergeire na humigit-kumulang 5.3 milyon ang nabakunahan laban sa tigdas at rubella noong Mayo 15.

Ang pinakahuling bilang na ito ay kumakatawan sa 55.47 porsyento ng kabuuang karapat-dapat na populasyon.

Samantala, humigit-kumulang 1.6 milyong bata ang nakatanggap ng bakuna laban sa polio o 52.12 porsiyento ng kabuuang karapat-dapat na populasyon, dagdag niya.

Bukod dito, namahagi rin ang DOH ng vitamin A supplement sa 2.2 milyong bata.

Layon ng kampanya na mabakunahan ang 9.5 milyong bata laban sa tigdas at rubella at mabigyan ng bivalent oral polio vaccine ang 11 milyong bata.

Sa huling datos ng Unicef, nagpapakita na ang Pilipinas ay mayroong mga batang 1,048,000 zero-dose, pangalawa sa pinakamataas sa East Asia at sa Pacific Region, at ika-lima sa buong mundo na pinakamataas.

Kabilang sa nangungunang 5 rehiyon na may pinakamaraming zero-dose na bata ang Calabarzon (146,160), Central Luzon (99,541), Western Visayas (96,774), Bicol (80,905) at ang Bangsamoro (75,671). Jocelyn Tabangcura-Domenden