Home OPINION DOH AT FDA MAY BABALA SA PAGGAMIT NG I.V. GLUTATHIONE AT GEL...

DOH AT FDA MAY BABALA SA PAGGAMIT NG I.V. GLUTATHIONE AT GEL PATCH

NAGBIBIGAY-BABALA ang DOH o Department of Health sa posibleng masamang epekto ng paggamit ng I.V. o intravenous glutathione na wala pang pag-apruba mula sa FDA o Food and Drug Administration.

Sinabi mismo ni DOH secretary Teodoro Herbosa na ba­gamat nakapagpuputi ng balat na mala-Caucasian ang gumagamit nito, maaari nitong sirain ang kidneys at magresulta sa pagkamatay.

Ayon pa sa kalihim, ang I.V. glutathione ay hindi ligtas na gamitin sa mga klinika at sadyang ginawa para sa mga ospital lamang dahil ginagamit ito bilang rescue medicine for chemotherapeutic complications of cancer.

Pagbibigay-riin ni Secretary Herbosa, ang paggamit nito sa mga klinika ay iligal dahil hindi ito rekomendado ng FDA para sa skin whitening.

Ukol naman sa kaso ng isang 36 year old na babaeng nasawi sa isang klinika sa Quezon City matapos diumanong bigyan ng I.V. glutathione at stem cell intravenous infusion ay iniimbestigahan na ng kagawaran.

Sa kabila ng paulit-ulit na babala ng FDA, nababahala ang DOH na may health and beauty salons, wellness spas, at beauty clinics na nag-aalok ng I.V. glutathione injection.

Wala pa umanong clinical trials na makapagpapatunay na epektibo ang I.V. glutathione injection para sa pagpapaputi, ang mayroon ay ang negatibong epekto nito sa liver, kidneys at nervous system. Gayundin sa posibilidad ng pagkakaroon ng HIV, hepatitis C at B, at impeksyon kung hindi malinis ang injection na ginamit.

May babala rin ang FDA  sa publiko hinggil sa pagbili at paggamit ng isang uri ng cooling gel patch para sa mga bata na mayroong sinat o lagnat.

Ayon sa FDA, ang medical device product na “Fever Aid for Kids” ay walang kaukulang product notification certificate, ibig sabihin, hind ito dumaan sa kanilang pagsusuri kaya hindi nakatitiyak sa kalidad at kaligtasan nito.

Ang nasabing gel patch ay inilalagay sa noo ng isang batang may sakit para bumaba ang temperatura ng katawan nito.

Alinsunod sa Republic Act No. 9711 o ang FDA Act of 2009, ang paggawa, importasyon, paglabas, pagbenta, pag-alok, distribusyon, promosyon, at sponsorship ng isang health product nang walang kapahintulutan ng ahensiya ay ipinagbabawal.

Sabi ng FDA sa kanilang advisory, pinagbabawalan ang mga establisimyento na magbenta, magkaroon ng distribusyon at promosyon ng nasabing produkto hangga’t wala itong naipapakitang kaukulang papeles.

Humingi rin ng tulong ang ahensiya sa lahat ng law enforcement agencies at local government units na hindi dapat na nagkakaroon ng anomang transaksyon sa merkado ang produkto sa kani-kanilang mga hurisdiksyon.

Inatasan din ang BOC o Bureau of Customs na higpitan ang pagpasok sa bansa ng nasabing produkto.

Previous articleIlang kaso ng pagpaslang sa mga mamamahayag, pinag-usapan ng DOJ at ng UN Special Rapporteur
Next articleQC EXTENDS BUSINESS TAX PAYMENT DEADLINE