MANILA, Philippines- Hindi pa agarang maibabalik sa Pilipinas si dating Negros Oriental Representative Arnolfo Teves para harapin ang mga kasong murder kaugnay sa pagpatay kay Negros Oriental Governor Roel Degamo noong 2023.
Ipinaliwanag ni Department of Justice (DOJ) Undersecretary Raul Vasquez na maaari pa kasing maghain si Teves ng motion for reconsideration sa naging desisyon ng Court of Appeals ng Timor-Leste na naggawad sa extradition request ng Pilipinas laban sa kanya.
Sinabi ni Vasquez na mayroon pang 30 araw ang kampo ni Teves upang iapela ang naturang desisyon.
Gayunman, malaki ang tiwala ng DOJ na hindi magbabago ng desisyon ang CA ng naturang bansa upang tuluyan nang maipatapon pabalik ng Pilipinas si Teves.
“We are very confident that the same decision would be rendered in the motion for reconsideration order and that would be denied in due course by the Timor-Leste judicial authorities.”
Iginiit naman ng legal counsel ni Teves na si Ferdinand Topacio na hindi pa maaaring pauwiin si Teves dahil hindi pa umano nareresolba ang kanilang hiling na political asylum sa Timor-Leste.
Kinontra naman ito ni Vasquez at sinabing dalawang beses nang ibinasura ng Timor-Leste ang kanilang kahilingan. Dahil dito, maari aniyang maaresto muli si Teves dahil sa pagiging illegal alien matapos kanselahin ng Pilipinas ang kanyang pasaporte.
Sa kasalukuyan ay pinaghahandaan na ng DOJ ang pagbabalik sa bansa ni Teves.
Magugunita na buwan ng Marso nang naaresto si Teves matapos maglabas ng red notice ang International Criminal Police Organization (Interpol). Teresa Tavares
