MANILA, Philippines – Magdudulot ng maulap na kalangitan na may kalat-kalat na pag-ulan at pagkidlat-pagkulog sa Palawan, Visayas, at Mindanao ang easterlies ngayong Martes, Nobyembre 7, 2023, iniulat ng PAGASA.
Ang Rehiyon ng Bicol, Silangang Visayas, Surigao del Norte, Dinagat Islands, at Quezon ay magkakaroon ng maulap na papawirin na may kalat-kalat na pag-ulan at pagkidlat-pagkulog dahil sa easterlies na may posibilidad ng flash flood o landslide dahil sa katamtaman hanggang sa kung minsan ay malakas na pag-ulan.
Ang Batanes at Babuyan Islands ay magkakaroon ng bahagyang maulap hanggang sa maulap na papawirin na may pulu-pulong mahihinang pag-ulan dahil sa Northeast Monsoon o Amihan.
Ang Metro Manila at ang nalalabing bahagi ng bansa ay magkakaroon ng bahagyang maulap hanggang sa maulap na papawirin na may pulu-pulong mga pag-ulan o pagkidlat-pagkulog dahil sa easterlies at localized thunderstorms. Ang mga flash flood o pagguho ng lupa ay maaaring mangyari sa panahon ng matinding bagyo.
Sumikat ang araw bandang 5:53 a.m., at lulubog ito ng 5:26 p.m. RNT
