Guam binayo ng Super Typhoon Mawar

GUAM – Nanalasa ang Category 4 na bagyo sa Guam nitong Huwebes, Mayo 25.

Taglay ng Super Typhoon Mawar ang lakas ng hangin na aabot sa 140 milya kada oras o 225 kilometro kada oras at nagdala ng pag-ulan na aabot sa 5 centimeter per hour sa magdamag.

Ayon sa US National Weather Service (NWS), inilagay na sa Category 4 ang kategorya ng bagyo o ikalawa sa pinakamalakas na kategoryang itinatakda sa Saffir-Simpson Hurricane Wind scale.

Sa bilis nitong 8 mph, posibleng magdulot pa ang bagyong Mawar ng mas maraming serye ng pagguho ng lupa, pagbaha at storm surge sa maraming lugar sa Guam.

“I’m very worried for our people’s safety and very concerned,” sinabi ni Guam Governor Lou Leon Guerrero sa panayam nitong Miyerkules.

Ikinumpara ni Guerrero ang bagyong ito sa bagyo noong 1962, o ang Typhoon Karen kung saan pinadapa ang malaking bahagi ng nasabing US territory.

Ayon sa paunang ulat, may mga tirahan nang sinira si Mawar at nagkaroon din ng pwersahang paglilikas sa walong katao.

Kasunod nito, inaprubahan na ni US President Joe Biden ang emergency declaration para sa federal assistance sa Guam.

“The White House is in close contact with the government of Guam and has offered as much support as needed to this tragic, tragic major storm,” sinabi ni White House spokesperson Karine Jean-Pierre. RNT/JGC