Higit 8M nabakunahan sa Chikiting Ligtas 2023 – DOH

MANILA, Philippines- Mahigit walong milyong bata ang nabakunahan laban sa tigdas at polio, halos isang buwan matapos ilunsad ng Department of Health ang nationwide immunization drive laban sa highly transmissive ngunit preventable infectious disease.

Batay sa pinakahuling tala ng DOH, 6,750,475 na bata ang nabakunahan laban sa tigdas. Katumbas ito ng hindi bababa sa 69.56 porsyento ng karapat-dapat na populasyon para sa mga bakuna sa tigdas at rubella.

Umakyat naman sa 2,024,747 ang bilang ng mga batang nabakunahan laban sa polio o hindi bababa sa 62.72 ng target ng DOH.

Ayon sa DOH, ang mga bilang na ito kapag pinagsama-sama ay nagpapakita ng kabuuang 8,775,222 mga bata na nabakunahan sa ilalim ng Chikiting Ligtas o ang pambansang paglulunsad ng mga supplementary immunization activities ng Kagawaran laban sa tigdas, rubella, at polio.

Hinikayat ni DOH Officer-in-Charge (OIC) Maria Rosario Vergeire ang mga magulang at legal guardianship na pabakunahan ang kanilang mga anak laban sa nabanggit na mga sakit.

Inilunsad ang Chikiting Ligtas 2023 noong Abril 27 .Ang inisyatiba na ito ay isasagawa hanggang Mayo 31. Jocelyn Tabangcura-Domenden