MANILA, Philippines – Tatlo pang mga suspek sa pagpaslang kay Negros Oriental Governor Roel Degamo ang bumaligtad sa nauna nilang testimonya na nag-uugnay kay suspended Congressman Arnie Teves Jr. sa kaso.
Kinumpirma ni Atty. Danny Villanueva na nagsumite na ng affidavit of recantation sina Rogelio Antipolo, Rommel Pattaguan at Dahniel Lora.
Ayon kay Villanueva, pumirma si Antipolo sa naunang salaysay dahil sa takot umano na maisailalim sa torture at mapahamak ang pamilya.
Magugunita na nitong Lunes, Mayo 22 ay naghain din ng affidavit of recantation si Osmundo Rivero sa Department of Justice at sinabing hindi niya talaga kilala si Teves at ang bodyguard ng kongresista na si Marvin Miranda.
Ayon kay Rivero, pinilit umano siya na pirmahan ang limang pahinang affidavit na nakasaad na si Teves ang nasa likod ng krimen.
Magugunita na napatay si Degamo noong Marso 4 sa loob mismo ng compound ng gobernador sa bayan ng Pamplona. Teresa Tavares
