MANILA, Philippines – Iminungkahi ni Senate Minority Leader Aquilino “Koko” Pimentel III sa Department of Tourism (DOT) na rebyuhin ang ”Love the Philippines” campaign matapos pumalpak ang promotional video na naglalaman ng kinopyang video footages sa ibang bansa.
Sa episode ng ”The Mangahas Interviews” nitong Sabado, sinabi ni Pimentel na hindi nito nakikitang “brilliant” ang islogan.
”Ngayon, ‘yung ‘Love the Philippines’ for me hindi rin siya ganoon ka-imaginative or creative or brilliant. Ang contribution doon is one word, ‘love’. ‘Yun lang ‘yun. Kasi ‘the Philippines’, ulitin ko, ‘yan ang pangalan na ‘yan. ‘The Philippines’, tayo ‘yan. ‘Di na inimbento ‘yan, ‘di na kailangan isipin ‘yan. ‘Love’ lang ‘yung naisip,” ayon kay Pimentel kay veteran journalist Malou Mangahas.
”Siguro panahon na to revisit it and i-review ng Department of Tourism, ano ba ‘yung epekto ng ‘It’s More Fun in the Philippines’? Ano ba ‘yung mga data and statistics doon? Kung may empirical data, real life data or information na okay, kinagat ng rest of the world ‘yon, nag-click ‘yan as a marketing slogan or marketing program, ituloy na lang natin kaysa sa ganito,” dagdag niya.
Binatikos din niya ang kawalan ng kasipagan sa preparasyon ng promotional video na ipinalabas matapos ilunsad ang bagong tourism slogan noong June 27.
”Yung unang hakbang ng pag-implement nila ng new marketing slogan and strategy, nadapa agad e. Ano bang nangyari doon? Bakit kasi ganu’n? Kahit ‘draft’ video lang ‘yun, gumamit na lang sila ng real Philippine scenery,” ayon kay Pimentel.
“Mistake ‘yun, may pagkakamali ‘yung nag-draft ng video na ‘yun. Kulang sa sipag, kulang sa honesty,” giit pa niya.
Iminungkahi din niya na pagsama-samahn ang lahat ng dating islogan, ”It’s More Fun in the Philippines” at “‘Wow Philippines” sa kasalukuyan na magiging “It’s more fun to love the Philippines, e di wow”.
Nitong Miyerkoles, inihayag ni Senate tourism committee chairperson Nancy Binay na hindi na maaari pang sagipin ang pumalpak na “Love the Philippines” slogan kaya’t iminungkahi nito sa DOT na bumalik sa dating islogan.
pero, nagmatigas si Tourism Secretary Christina Frasco na itutuloy ang paggamit ng islogan.
Si Frasco ay pinuna ng Commission on Audit sa pagbili ng multi-milyong halaga ng lechon sa bayan ng Liloan noong nagsisilbi pa itong alkalde ng lugar. Ernie Reyes
