Mandatory face mask sa loob ng Manila City Hall, ipatutupad

MANILA, Philippines – INIUTOS ni Manila Mayor Honey Lacuna-Pangan na gawing “mandatory” o sapilitan ang pagsusuot ng face mask ng mga empleyado at mga bibisita sa lahat ng tanggapan sa loob ng Manila City Hall simula ngayong Lunes, Mayo 15.

Ang nasabing kautusan ay ipinahayag ni Lacuna sa kanyang pagsasalita sa ginanap na regular na pagpupugay sa watawat ng Pilipinas, Lunes ng umaga, sa Kartilya ng Katipunan bunsod na rin ng patuloy na pagtaas ng kaso ng COVID-19 sa Lungsod ng Maynila.

Nilinaw naman ng alkalde na ipatutupad lamang ang nasabing kautusan sa Pamahalaang Lungsod ng Maynila.

Sa kabila naman nito, inanunsiyo naman ng alkalde ang magandang balita sa mga kawani matapos niyang atasan ang mga ito na ayusin na ang kanilang mga payroll kung saan maaari na umanong makuha ang kanilang mid-year bonus sa linggong kasalukuyan.

“May maiuuwi na naman po kayo sa inyong pamilya, Pagkaingatan nyo po ito, hinay-hinay lang ang paggastos dahil alam naman po nyo, medyo may kahirapan pa rin po ang ating pamumuhay,” pahayag ng alkalde.

Samantala, pinangunahan naman ni Mayor Honey ang sashing ceremony sa mga opisyal na kandidata ng Miss Manila na ginanap sa Bulwagang Villegas sa Manila City Hall nitong hapon ng Lunes.

Isa-isang ipinakilala ang mga nasabing kandidata at inanyayahan ng mga nag-organisa ng nasabing beauty pageant at ng lokal na pamahalaang lungsod ang publiko partikular na ang mga Manilenyo na suportahan at panoorin ito sa darating na Hunyo 23 kung saan isa ito sa bahagi ng pagdiriwang ng ika-452 “Araw ng Maynila”.  JAY Reyes