MANILA, Philippines – Iniimbestigahan na ng Metropolitan Waterworks and Sewerage System (MWSS) ang mga reklamo ng manilaw-nilaw na tubig mula sa Maynilad Water Services Inc.
Sa isang pahayag, sinabi ng MWSS Regulatory Office (MWSS-RO) na sinusubaybayan nito ang pagdagsa ng mga reklamo ng customer sa social media hinggil sa napaulat na “poor aesthetic” na kalidad ng tubig na ibinibigay ng water concessionaire.
Dahil dito, sinabi ng ahensya na kasalukuyang iniimbestigahan ang isyu at nakikipag-ugnayan sa Maynilad para matukoy ang ugat ng iregularidad at maipatupad ang anumang kinakailangang corrective actions.
Kinumpirma rin ng tagapagsalita ng Maynilad na si Jennifer Rufo na ang water distribution utility ay nakatanggap ng mga ulat mula sa mga consumer nito ng madilaw na supply ng tubig sa ilang bahagi ng concession area ng kumpanya.
“This is due to higher manganese in the raw water passing through the low-level outlet of Angat Dam,” paliwanag ni Rufo.
“We have already adjusted chemical dosages in our treatment plants to address the yellowish discoloration in the water supply. Our field teams have also been doing local flushing activities in the network. The discoloration will gradually ease over the next few hours,” dagdag pa niya.
