MANILA, Philippines- Hangad ng bagong Kalihim ng Department of Social Welfare and Development (DSWD) na rebisahin o baguhin ang logistics setup ng bansa para sa relief operations upang mas maging “responsive” ang departamento.
Sinabi ni Sec. Rex Gatchalian na ito ay “shared priority” nila ni Pangulong Ferdinand Marcos Jr., na “very concerned” sa climate change at epekto nito sa “relief efforts” para sa mga apektadong pamilya sa panahon ng kalamidad.
“Sa lawak ng Pilipinas, sabi ko kay presidente, dapat mag-set up tayo ng mas maigi pa na logistics setup,” ayon sa Kalihim sabay sabing, “When you say logistics, ‘yan ‘yung warehousing, transport ng goods.”
“What I said [to the president], dapat hatiin natin into bite-sized geographic areas wherein instead of one central location ng warehousing, dapat multiple sites para you can be very omnipresent faster,” dagdag na wika ni Gatchalian.
“It’s a superior logistics program that we’re looking at. After all, calamity management and relief operations [are] about logistics,” paliwanag ng kalihim.
Sa ulat, nahaharap sa 20 tropical cyclones kada taon ang Pilipinas na isang climate-vulnerable subalit ang epekto ng weather disturbances ay hindi matantya dahil sa climate change.
Inihalimbawa ni Gatchalian ang masamang panahon na naranasan sa Eastern Visayas simula Enero 2, nakaapekto sa mahigit milyong residente at nag-iwan ng ilang patay na indibidwal.
Sa kabilang dako, sinabi pa ni Gatchalian na nagtakda siya ngayong araw ng Huwebes, Pebrero 2, ng whole-day briefing sa mga undersecretary ng departamento para talakayin ang mga programa ng DSWD.
Sa kabilang dako, hinggil naman sa usapin ng Pantawid Pamilyang Pilipino Program (4Ps), winika ni Gatchalian na dapat na suriing mabuti ang database nito at marapat lamang na makapagpalabas ang DSWD ng “index of success measurement.” Kris Jose
