MANILA, Philippines – Ibinida ng National Capital Region Police Office o NCRPO sa pamumuno ni P/ Major General Jonnel Estomo ang kanilang mga naaresto na mga suspek at naresolba na krimen mula Enero 23 hanggang ngayong araw, Pebrero 6.
Sa isinagawang pulong balitaan sinabi ni NCRPO Deputy Regional Director PBrigGen Jack Wanky na umabot sa 417 ang mga naarestong mga suspek na naitala simula noong Enero 23, P10 milyon naman na halaga ng ipinagbabawal na droga at 30 loose firearms ang kanilang nakumpiska.
Humarap naman sa naturang presscon ang mga kaanak ng mga biktima ng rape at murder kung saan nagpasalamat naman sila sa mabilis na aksyon ng mga pulis at pagresolba sa kaso.
Nagpasalamat din si Gen. Wanky sa mga kaanak ng biktima dahil nakakataba aniya ng puso dahil boluntaryo pa silang nagtungo sa NCRPO upang magpasalamat sa sakripisyo ng mga tauhan ng NCRPO.
Inamin naman ni Police Colonel Roderick Roy Jr. na malaki ang naging tulong ng kooperasyon ng publiko sa pamamagitan ng Kasimbayanan sa pagresolba sa mga kaso at pagkakaaresto sa mga suspect. Cesar Morales
