MIF bill planong maisabatas bago mag-SONA – Diokno

MANILA, Philippines – Target ng economic managers ng administrasyong Marcos na maisabatas ang Maharlika Investment Fund (MIF) bill bago ang State of the Nation Address (SONA) ni Pangulong Ferdinand Marcos Jr. sa Hulyo, ayon kay chief economic manager at Finance Secretary Benjamin Diokno nitong Martes, Mayo 16.

Sa pahayag, sinabi ni Diokno na nais ng economic team na maaprubahan na ang Senate Bill No. 2020 na nagtatatag sa MIF sa ikatlong pagbasa bago magtapos ang sesyon sa Hunyo 2, 2023.

“The Maharlika Investment Fund bill is making significant progress in the Senate, and we hope to see it signed into law before the President’s second State of the Nation Address on July 24,” ani Diokno.

Ang Senate Bill No. 2020 ay nakaabot na sa Senate floor noong Marso 20.

Nitong Lunes, Mayo 15, dumalo si Diokno kasama sina Budget Secretary Amenah Pangandaman at National Economic and Development Authority (NEDA) Secretary Arsenio Balisacan sa Senate plenary session upang ipakita ang kanilang buong suporta kasabay ng serye ng debate sa MIF.

Ipinaliwanag naman ni Senador Mark Villar, sponsor ng panukala, na makapagbibigay ng mas mataas na kita sa gobyerno ang MIF.

Sa ilalim ng SB 2020, ang inisyal na kapitalisasyon ay magmumula sa investible funds ng Land Bank of the Philippines at Development Bank of the Philippines; dividend remittances ng Bangko Sentral ng Pilipinas; national government share of income mula sa Philippine Amusement and Gaming Corporation; at proceeds mula sa privatization at transfer of assets.

“Ako po, galing po ako sa infrastructure dahil ako po yung dating secretary of DPWH [Department of Public Works and Highways], at nakita ko rin po na maraming infrastructure projects na nangangailangan ng karagdagang pondo at minsan hindi rin kaya ng GAA or General Appropriations Act ng gobyerno. Kaya kailangan natin magkaroon ng ibang fund sources,” sinabi ni Villar.

“Isa po itong additional source of funding na wala po tayo ngayon,” dagdag pa ng senador.

Ang funding sources ng pamahalaan para sa big-ticket projects ay karaniwang nagmumula sa foreign loans at internal funds sa pamamagitan ng national budget. RNT/JGC