Nagpakilalang tauhan ng MMDA, arestado sa robbery extortion, usurpation of authority

MANILA, Philippines – INARESTO sa isinagawang entrapment operation ng Metropolitan Manila Development Authority (MMDA) – Intelligence and Investigation Office (IIO) at ng Quezon City Police District (QCPD) ang isang 36-anyos na lalaki dahil sa umano’y pangingikil habang nagpapanggap bilang tauhan ng MMDA.

Kinilala ang suspek na si Jacob Arellano, residente ng Antipolo Rizal, na inaresto nitong Mayo 17 sa Cubao, Quezon City, makaraang ireklamo ng terminal operator ng UV Express vans dahil sa ilegal na aktibidad nito.

Batay sa ulat ng pulisya, isang commuter van na nakatalaga sa terminal ng complainant ang na-impound para sa colorum operation noong Abril 27 at dinala sa MMDA Tumana impounding site sa Marikina City.

Tinawag ni Arellano ang complainant at sinabing nagtatrabaho siya sa ilalim ng MMDA Office of the General Manager.

Ayon sa complainant, sinabihan siya ni Arellano na kailangan niyang magbayad ng P15,000 kada buwan para hindi mahuli ang mga UV Express van na nasa kanyang responsibilidad. Ang P7,500 ay ibibigay bilang pagbabayad sa ika-15 at sa katapusan ng bawat buwan, ayon sa pagkakabanggit.

Nagkita ang complainant at si Arellano noong Abril 30 sa Arayat, Cubao, Quezon City, at ibinigay sa kanya ang P7,500 na hinihingi nito.

Noong Mayo 15, tinawagan ni Arellano ang nagrereklamo at pinaalalahanan siya tungkol sa P7,500 na bayad. Tinukoy niya ito bilang “SOP,” at binantaan siya na ang lahat ng kanilang mga van ay i-impound kung hindi niya ipagpatuloy ang pagbibigay ng “SOP” na mga pagbabayad.

Noong Mayo 16, muli silang nagkita at iniabot nito sa kanya ang P7,500. Gayunman, humingi si Arellano ng panibagong P15,000 para sa pagpapalaya sa dating na-impound na van.

Dahil dito, humingi na ng tulong ang complainant sa MMDA IIO, na nag-ulat ng insidente kay General Manager Usec. Procopio Lipana.

Bilang tugon, inutusan ni Usec. Lipana ang IIO na makipag-ugnayan sa QCPD Criminal Investigation and Detection Unit para magplano ng entrapment operation laban sa suspek na nagresulta sa pagkaka-aresto dito.

“Upon receipt of information, we immediately verified if Arellano is listed under the MMDA roster of employees and coordinated with the authorities,” ani Lipana.

Naglabas din ng sertipikasyon ang MMDA Administrative Service na hindi tauhan ng MMDA si Arellano.

Samantala, nagbabala naman si MMDA Acting Chairman Atty. Don Artes sa publiko laban sa mga indibidwal na nagpapanggap na empleyado ng MMDA upang mangikil ng pera.

“Wrongdoings like “kotong” or “payola” will never be tolerated. We call on the public to be on the lookout for these dubious people and report suspected illegal transactions. We will not let anyone tarnish the image of the Authority,” ani Atty. Artes.

Sinabi pa niya na hindi niya kukunsintihin ang anumang iligal na aktibidad na nakapipinsala sa ahensya, gawin man ito ng ordinaryong mamamayan o empleyado ng MMDA.

Kaugnay nito, hinimok din ni Lipana ang mga taong nabiktima ni Arellano na iulat sa ahensya ang kanyang mga ilegal na gawain.

Kasalukuyang nakakulong si Arellano sa CIDU QCPD, Camp Karingal, Quezon City. Kasong robbery (extortion) at usurpation of authority ang isinampa laban sa kanya. JAY Reyes