MANILA, Philippines – Kinokonsidera ni Department of Health chief Ted Herbosa ang pagkuha ng mga hindi lisensyadong nursing graduates para magtrabaho sa gobyerno.
Sa ngayon kasi naghahanap siya ng solusyon para mapunan ang 4,500 bakanteng posisyon para sa nars sa gobyerno.
Isa nga sa naisip niya ang pagbibigay trabaho sa mga hindi lisensyadong nursing graduates kung mayroon silang mga diploma mula sa accredited nursing schools.
Kung papayagang magtrabaho sa gobyerno, sinabi niya na ang mga nagtapos ay maaaring makakuha ng panimulang suweldo na humigit-kumulang P35,000 hanggang P40,000, na tataas sa karanasan.
“Mayroon kaming ilang mga nars na hindi pumasa sa board examination at walang lisensya. Sa gobyerno, hindi ka makapagtrabaho nang walang lisensya, pero willing akong kunin sila kung may diploma sila,” ani Herbosa sa interbyu sa ANC.
“Gagawin ko itong karapat-dapat. If you have a diploma in an accredited school, recognized, I give you a period of time to pass it… You make them work for five years, I’m giving you five years to pass the board exam,” aniya pa.
Sinabi ni Herbosa na mamumuhunan pa siya sa pag-mentoring sa mga magsisipagtapos upang makapasa sila sa board exam sa loob ng limang taon at matanggap ang buong suweldo at benepisyo dahil sa isang lisensiyadong nurse.
Gayunman, ipinunto niya na kailangan pa niyang suriin sa PRC kung kailangang amyendahan ang batas para payagan ang mga ito.
Nauna nang sinabi ng Private Hospitals Association of the Philippines Inc. (PHAPI) na 40% hanggang 50% ng mga nurse sa mga pribadong ospital ang nagbitiw sa nakalipas na dalawang taon dahil sa isyu ng suweldo.
Habang inaamin na ang mga Filipino healthcare worker ay may karapatan na makakuha ng mas mahusay na suweldo, sinabi ni Herbosa na ang kanilang mga alalahanin ay kailangang matugunan upang sa halip ay maibigay nila ang kanilang world-class na serbisyo sa Philippine healthcare system. RNT
