Nasa 4K na preso pinalaya sa administrasyong Marcos – BuCor

MANILA, Philippines – Tinatayang nasa 4,000 preso ang pinalaya na sa ilalim ng administrasyon ni Pangulong Ferdinand Marcos Jr., sinabi ni Bureau of Corrections director general Gregorio Catapang Jr.

“Umabot na po siguro ng mga… more or less aabot ng 4000, sa panunungkulan ng ating mahal na pangulo,” pagbabahagi ni Catapang sa panayam ng TeleRadyo.

Nang matanong naman kung ano ang criteria na sinusunod ng BuCor sa pagpapalaya sa mga inmates o persons deprived of liberty (PDLs), ang sagot niya ay prayoridad nila ang mga kwalipikado sa parole, lalo na ang mga senior citizen at mga nakapagtala ng good conduct.

“Unang-una po, ‘pag puwede na pong i-parole — naserve na po ang kalahati ng haba ng kanilang pagkakakulong — tinitingnan kung puwede nang ipa-parole, lalo na kung may mga edad na po at matatanda na. At [those with] good conduct… talaga pong pinagsisisihan na at nagbagong buhay na po,” paliwanag ni Catapang.

Dagdag pa niya, pinabilis din ni Marcos at ni Department of Justice Secretary Boying Remulla ang pagpapalaya sa mga inmate na edad 75 pataas, maging ang mga may sakit.

Layon naman ng BuCor na mailipat na ang 7,500 inmates mula sa New Bilibid Prison mula sa iba’t ibang pasilidad sa bansa ngayong taon.

“Itong taon na po ito, maglilipat po kami ng 7,500; ‘yung mga nasa minimum at medium [security] ililipat namin. Then hopefully itong remaining four years — sa 2024, magsisimula kaming maglipat nang mas maraming mga PDL sa Mindoro, Leyte, Palawan, at Davao,” ani Catapang. RNT/JGC