NGCP ginisa ni Tulfo; 99% ng kita, napupunta sa shareholders!

MANILA, Philippines- Halos walang ipinupuhunan sa redevelopment o reinvestment projects bagkus, ipinamamahagi ng National Grid Corporation of the Philippines (NGCP) ang mahigit 99% ng kinikita nito bilang dibidendo sa shareholders.

Natuklasan ito ni Senador Raffy Tulfo, chairman ng Senate committee on energy sa ginanap na imbestigasyon ng Senado sa sunod-sunod na brownout sa iba’t ibang bahagi ng bansa.

Nitong Miyerkules, ginisa ni Tulfo ang NGCP sa imbestigasyon dahil umaabot sa 75 hanggang 99% ng kinikita nito sa buong taon ang napupunta sa dividends na kinokolekta ng shareholders.

Sa pagdinig, kinuwestiyon ni Tulfo ang NGCP hinggil sa kinikita at dividends nito sa 2014, 2015, 2017, at 2019 saka binanggit ang ulat na kakarampot lamang ang inilalaan ng kompanya sa kinikita nito para sa redevelopment o reinvestments.

Inilatag ni NGCP assistant corporate secretary Ronald Dylan Concepcion na ang mga sumusunod ang net income at dividend ng kompanya sa partikular na taon:

2014

• Net Income: P22 billion

• Dividends: P24 billion

2015

• Net Income: P22.5 billion

• Dividends: P21 billion

2017

• Net Income: P20.6 billion

• Dividends: P19 billion

2019

• Net Income: P20.030 billion

• Dividends: P15 billion

Dahil dito, kaagad kinastigo ni Tulfo ang NGCP matapos matuklasan na noong 2019 lang, umabot sa 75% ng kinita nito ang napunta sa dividends, 99% noong 2017 sa profit sharing; at noong 2014, mas mataas ang dividend kumpara sa net income.

“Only in the Philippines na for profit ang transmission. It should not be for profit. Maliwanag pa sa sikat na araw nag-tumitib-tiba ‘yung mga may ari nito,” ayon kay Tulfo.

Kaya, ayon kay Tulfo, maraming proyekto ng NGCP ang hindi natatapos dahil napupunta lamang ang dambuhalang kita nito bilang tubo ng shareholders.

“Kaya pala hindi ma-comply comply ang nasa kontrata na mag-invest kayo sa connectivity at nagpapalusot na lang kayo (ng dahil sa) COVID, puro COVID. And then after COVID, ‘yung right-of-way (ang reason). See?” ayon kay Tulfo.

“Nagkakaproblema na nga kayo sa development. Ba’t di ninyo binuhos don ang dibidendo? Sana binuhos, ni-reinvest sa development,” giit pa niya.

Ibinahagi naman ni NGCP spokesperson Cynthia Alabanza na lumaki ang net profit at dividends mula sa mga nakaraang taon kaya hindi natatanging source ng net income sa partikular na taon ang shares na napunta bilang dividdends ng shareholders.

“Our profits or dividends were taken from retained earnings which have accumulated over the years. So it’s not a one is to one po. Kung ano ang dineclare for this year does not really necessarily come solely from the profits earned from that particular year. So accumulated po yan over the years. So the numbers may or may not match,” ayon kay Alabanza sa Senate panel.

Umuutang din umano sa bangko ang NGCP para sa capital outlay nito, ayon kay Concepcion.

Kinuwestiyon din ni Tulfo ang shares ng China State Grid Corporation na mas malakas mag-veto kahit kakarampot ang shares nito kumpara sa dalawang kompanya na pag-aari ng Filipino na may tig-30% shares.

Ipinakuha ng komite ang shareholders agreement ng NGCP upang maliwanagan ang ulat.

Pag-aari ang NGCP ng Monte Oro Grid Corporation (30%), Calaca High Power Corporation (30%), at State Grid Corporation of China (40%). Ernie Reyes