NSWMC inaprubahan ang solid waste management plan ng 54 LGUs

MANILA, Philippines – UPANG epektibong maipatupad ang solid waste management system sa bansa ay inaprubahan ng National Solid Waste Management Commission (NSWMC) na pinangangasiwaan ng Department of Environment and Natural Resources (DENR) ang 10-year solid waste management plans (SWMPs) ng 54 lungsod at munisipalidad sa buong bansa.

Nabatid na sa kasalukuyan, umabot na sa 1,263 ang naaprubahan na ang SWMP o 79 percent mula sa kabuuang 1,592 local government units (LGU) na kinakailangang magsumite at ipatupad ang kanilang plano bilang pagsunod sa Republic Act (RA) 9003 o ang Ecological Solid Waste Management Act of 2000.

Sa press release noong Abril 25, 2023 sa ginanap na en banc meeting na pinangunahan ni DENR Secretary Antonia Loyzaga, nang aprubahan ang SWMPs ng 54 LGUs.

Siyam sa mga ito ang nagmula sa Northern Samar, gayundin sa Negros Occidental; tatlo sa Iloilo, Cotabato, at Camarines Sur; dalawa sa Ilocos Sur, Masbate, Negros Oriental, Misamis Oriental, Catanduanes, Albay, Batanes, at Cebu; at isa ang nagmula sa mga lugar ng Pangasinan, Cagayan, Isabela, Nueva Vizcaya, Sorsogon, Antique, Bohol, Zamboanga del Sur, Quezon, Camarines Norte, at Lanao del Norte.

Kaugnay nito sa ginanap na pulong, binigyang-diin ni Loyzaga ang kahalagahan ng pagtutulungan sa pagitan ng NSWMC at ng stakeholders nito para sa epektibong solid waste management system sa bansa.

“If we are not able to manage solid waste in the environment, we will not be able to deliver the kind of ecosystem services and ecosystem integrity we want to have to support succeeding generations,” saad ni Loyzaga.

Samantala tinalakay din ng DENR chief ang posibleng paraan upang maisaayos ang operasyon at sistema ng NSWMC kabilang na dito ang pagpapalakas sa ‘end-to-end profiling’ na nagbibigay ng impormasyon sa solid waste at kung paano ito pangasiwaan, ayusin, at wastong itapon.

“How we get there in terms of digital processes, observations, and systems is one of the challenges that needs to be confronted by all the stakeholders on this council,” dagdag nito.

Kabilang sa mga dumalo sa pulong ang mga kinatawan mula sa Environmental Management Bureau, Department of Trade and Industry, Department of the Interior and Local Government, Department of Science and Technology, Mother Earth Philippines, Ecowaste Coalition, Metropolitan Manila Development Authority, Department of Health, at mga representante mula sa recycling, at manufacturing/packaging industry.

Nakapaloob sa RA 9003 na ang bawat LGU ay kinakailangang bumuo ng 10-year SWMPs na naaayon sa National Solid Waste Management Framework ng NSWMC.

Kabilang sa SWMPs ng LGUs ang impormasyon sa inaasahang dami ng waste generation at ang target ng koleksiyon ng mga ito, paghihiwalay mula sa pinanggalingan, waste diversion, pagsunod sa materials recovery facility, collection vehicle, disposal facility at karampatang pondo sa loob ng sampung taon. Santi Celario