P15.3M claim ng Impact Hub tinanggihan ng Comelec, kulang sa dokumento

MANILA, Philippines – Tinanggihan ng Commission on Elections (Comelec) ang P15.3 million demand payment na ginawa ng Impact Hub Manila, ang official partner nito para sa naudlot na Eleksyon 2022 presidential at vice-presidential debates, dahil sa kakulangan ng documentary requirements na kailangan para maitatag ang validity ng claim.

“Upon evaluation, Impact Hub’s demand for payment is not accompanied by the documentary requirements necessary to establish the validity of claim,” sabi ng Comelec sa isang liham na may petsang Mayo 19, 2023 at nilagdaan ni Executive Director Teofisto Elnas Jr.

“In this regard, the Commission is constrained to DENY Impact Hub’s claim for P15,300,000,” dagdag pa.

Ang liham ay ipinadala kay Impact Hub legal counsel Ma. Karla Denise Frias.

Sa isang liham na may petsang Abril 27, 2023, sinabi ng Impact Hub na nananatili pa rin ang memorandum of agreement na ipinasok nito sa Comelec kahit na nagdesisyon ang poll body na iurong at kalaunan ay kanselahin ang mga debate.

Nagbabala ang Impact Hub Manila na gagamit ito ng legal na remedyo sa ilalim ng batas para mabawi ang utang at para maprotektahan ang interes ng kumpanya sakaling mabigo ang Comelec na tumugon o gumawa ng arrangement sa pagbabayad sa loob ng susunod na limang araw pagkatapos matanggap ang notice.

Ibinasura ang mga debate sa town hall na ginanap sana noong Abril 30 at Mayo 1, 2022, matapos tumalbog ang mga tseke na inisyu ng Impact Hub Manila na nagkakahalaga ng P14 milyon upang bayaran umano ang Sofitel Philippine Plaza Manila, ang venue para sa mga debate.

Sinabi ni Elnas na ang pagbabayad ay nangangailangan na ang supplier ay tumupad sa mga obligasyon nito alinsunod sa kontrata at delivery ng mga pangangailangan o performance of service, dapat na marapat na patunayan, at makitang sumusunod sa mga tuntunin at kundisyon ng kontrata.

Dapat din aniyang tiyakin ng procuring entity na lahat ng mga kinakailangan sa accounting at auditing ay natutugunan.

Binanggit din niya na sa Commission on Audit Circular No. 2012-001, nangangailangan ng “legalidad ng transaksyon at pagsunod sa mga batas, tuntunin at regulasyon” at “sapat at may-katuturang mga dokumento upang maitaguyod ang bisa ng paghahabol” para sa lahat ng uri ng mga disbursement.

“Claims for payment not compliant with the pertinent procurement, accounting and auditing rules will not be processed. Otherwise, such payment can be the subject of disallowance by the Commission on Audit, together with its concomitant consequences, i.e. criminal, civil and administrative liabilities,” paliwanag ni Elnas sa kanyang liham. Jocelyn Tabangcura-Domenden