P1M pabuya alok sa kakanta sa suspek sa Davao rape-slay

MANILA, Philippines – Nag-alok ang isang mambabatas ng P1 milyong pabuya sa sinumang makapagtuturo sa suspek na nanggahasa at pumatay sa isang 28-anyos na babaeng architect sa Calinan, Davao City.

Sa anunsyo ni Davao City First District Rep. Paolo Duterte nitong Linggo, Mayo 21, sinabi niya na ang alok na pabuya ay bilang pakikiisa sa kapwa-Davaoenos na sumisigaw ng hustisya sa brutal na pagpaslang kay Architect Vlanche Bragas.

“Si Ms. Vlanche Marie Bragas, ay isang ordinaryong Dabawenyo na araw-araw ay nagsisikap at nagtatrabaho para sa kanyang kinabukasan at kanyang pamilya. Labis akong nalungkot sa pangyayari,” pahayag ni Duterte.

Matatandaan na iniulat na nawawala si Bragas bandang alas-12 ng hatinggabi noong Mayo 17 at huling nakita sakay ng isang dilaw na tricycle sa Crossing Fausta, Barangay Dacudado, Calinan district.

Matapos ang ilang oras na paghahanap ay natagpuan ang wala nang buhay na katawan ng biktima sa isang open canal ng banana plantation.

Sa autopsy ng Regional Forensic Unit XI, napag-alaman na ginahasa, sinakal at pinatay ang biktima.

Bumuo na ng special investigation task group ang Davao City Police Office upang matukoy ang suspek sa pagpatay sa babaeng architect.

Kinondena naman ng United Architects of the Philippines (UAP) Davao Chapter ang naturang krimen at nanawagan ng agarang hustisya.

“We stand united in condemning the heinous act that befell Ar. Vlanche Marie Bragas. The news of her rape and subsequent abandonment in a desolate grassland has utterly shocked and anguished us. This unspeakable act goes against the very fabric of humanity and the principles we hold dear as architects, professionals, and fellow human beings,” ayon sa grupo.

“We cannot fathom the pain and anguish you and your family are enduring. As a chapter, we also sympathize with the UAP Alpha chapter for losing a valuable member. Our thoughts and prayers are with you, as we hope you find solace and strength in the memories of Ar. Vlanche Marie Bragas.” RNT/JGC