MANILA, Philippines – Nagmungkahi ang Philippine Anti-Organized Crime Commission (PAOCC) ng face recognition sa pagpaparehistro ng mga SIM (Subscriber Identity Module) card, na nagsasabing hindi sapat ang kasalukuyang mga patakaran para labanan ang mga text spam at scam.
Binanggit ni PAOCC Executive Director Gilbert Cruz ang mga kaso kung saan ang mga cartoon character ay ginagamit sa proseso ng pagpaparehistro at talagang tinatanggap ng SIM registration system ng mga kumpanya ng telecom.
“If it takes face to face registration to screen all those who are registering SIM cards, then it should be done. I think that’s the best suggestion we can do,” said Cruz.
Bukod sa face recognition, iminungkahi rin ni Cruz na alisin ng mga telecom companies ang system at mag-tap na lang ng grupo ng mga tao sa verification process ng mga nagrerehistro ng SIM card.
Ayon kay Cruz, kakailanganin ng maraming pagsisikap para sa manu-manong proseso ng pag-verify ngunit ito ay magsisiguro ng isang mahigpit at wastong proseso ng screening kaya dapat aniyang gawin muna ang manual verification pansamantala.
Ang pahayag ni Cruz ay sa gitna ng talamak na pagbebenta ng mga SIM card na ginagamit sa online scam at iba pang cybercrimes.
Sa mga kamakailang operasyon ng POGO (Philippine Offshore Gaming Operators) , sinabi ni Cruz na nakumpiska ng mga awtoridad ang libu-libong rehistradong SIM card sa mga ni-raid na establisyimento.
Ang pagkumpiska ng libu- libong rehistradong SIM card sa mga establisyimento ng POGO, ayon kay Cruz, ay nagpapahiwatig kung saan ginagamit ang mga SIM card na ito.
Umaasa si Cruz sa kasalukuyang mga pagdinig sa Kongreso upang mapabuti ang mga panuntunan sa pag-verify sa pagpaparehistro ng SIM.
Ang isa pang mungkahi na gagawin ng PAOCC ayon sa kanya, ay isa pang pagsusuri sa lahat ng mga SIM card na nakarehistro. Jocelyn Tabangcura-Domenden
