Paglikha ng ‘Anti-Agricultural Smuggling Courts’ itinutulak sa Kamara

Manila, Philippines – Isinulong na sa Kamara ang pagkakaroon ng “Anti-Agricultural Smuggling Courts.”

Inihain ni AGAP PL Rep. Nicanor Briones ang House Bill 8170, ang panukalang batas na magbibigay ng “exclusive original jurisdiction” sa mga kasong may kinalaman sa smuggling, hoarding, profiteering, at kartel ng iba’t ibang produktong agrikultural sa bansa.

Sinabi ni Briones na pangunahing layunin ng pagtatayo ng anti-agricultural smuggling courts ay upang maging kapareho ito o “same level” ng Sandiganbayan at Court of Appeals upang tuluyan ng ma-declog at mabawasan ang mga nakabinbing kaso sa ibang korte.

Ayon sa kongresista, kabilang sa probisyon ng panukala ay ang pagkakaroon ng apat na dibisyon na binibuo ng tatlong mahistrado bawat isa para sa National Capital Region (NCR), Bulacan, Cebu at Davao.

Isinulong ni Briones ang panukala kasunod ng “fiasco” at isyu ukol sa hoarding at smuggling ng mga sibuyas, asukal at iba pang produktong agrikultural kung saan nalantad ang mabagal na pagpapanagot sa mga lumalabag sa Anti-Agricultural Smuggling Act.

Binanggit ng kongresista ang datus na isinumite sa House Committee on Agriculture and Food ng Bureau of Customs (BOC) na nitong January 20, 2023 ay nasa 20 kaso lamang ang naisampa ng Department of Justice (DOJ) sa mga korte mula noong 2018 hanggang 2023.

Habang nasa 132 na mga kaso naman ang nananatiling nasa preliminary investigation.

Ang lawak aniya at epekto ng pagpupuslit ng produktong pang-agikultural ay maituturing na “economic sabotage” kung kaya panahon na upang magkaroon ng mga korte na tututok sa mga kasong ito.

Sa ganitong paraan ayon sa mambabatas ay mapapadali ang pagpapakulong at pagbibigay parusa sa mga smugglers, hoarders at iba pang responsable sa krimeng sumisira hindi lamang sa sektor ng agrikultura.

Ang mga ganitong iligal na gawain aniya ay nagdudulot ng kalugihan sa panig ng gobyerno na dapat sana ay inilalaan sa mga programa makatulong sa mga magsasaka. Meliza Maluntag