Pagpapalakas ng halal industry sa Pinas, suportado ni VP Sara

MANILA, Philippines – Nakikita ni Vice President Sara Duterte ang kahalagahan na palakasin ang industriya ng halal sa bansa.

Ito ay upang makahikayat umano ng mas marami pang mga turista ang Pilipinas.

Sa pahayag ng Office of the Vice President, sumasang-ayon si Duterte na palakasin ang halal industry upang matugunan ang pangangailangan ng mga Muslim at iba pang dayuhang turista.

Ang Halal ay ang mga pagkain at produkto na pinapayagan sa ilalim ng batas ng Islam.

Nitong Huwebes, Mayo 18 ay nagkaroon ng magkahiwalay na courtesy call sina Malaysian Ambassador Abdul Malik Melvin Castelino at Brunei Darussalam Ambassador Megawati Manan kay Duterte, at sinabi ng mga ito na ang pagpapalakas sa halal industry sa Pilipinas ay mas magtutulak para maging Muslim friendly ang bansa.

“With regard to the halal industry, yes, I agree with you,” sinabi ni Duterte kay Megawati, sabay-sabing bumuo siya ng konseho noong siya ay alkalde pa ng Davao City, para palakasin ang halal industry sa lungsod.

Aniya, bago magtapos ang kanyang termino bilang alkalde ay nakapagtayo ang lungsod ng halal slaughterhouse.

Sinabi naman ni Malik kay Duterte na maaari ring tingnan ang potensyal ng halal industry sa cosmetics.

Maliban sa usaping ito, sinabi ng OVP na nagpahayag ng interes ang mga envoy sa pagtutulungan sa aspeto ng edukasyon, turismo, trade and industry at pagpapalalim pa ng bilateral relations sa mga bansa. RNT/JGC