MANILA, Philippines- Umapela ang mga stakeholder ng aviation industry sa bansa sa Department of Transportation (DOTr) na itigil na ang nagbabadyang pagtaas sa landing at takeoff fees at iba pang mga singil na sinasabi nilang gagawin ang malapit nang isapribado na Ninoy Aquino International Airport (NAIA) na itinuturing na most expensive airport sa Asya.
Sa liham na ipinadala kay Transportation Secretary Jaime Bautista ng Air Carriers Association of the Philippines, Board of Airline Representatives at ng Airline Operators Council, sinabi nilang may matindi silang pag-aalala hinggil sa paparating na napakalaking pagtaas ng mga bayarin at singil kasabay ng iginawad kamakailang pribatisasyon ng NAIA.
Noong Pebrero, ang SMC-SAP & Co. Consortium, na ngayon ay tinatawag na New NAIA Infra Corp. (NNIC), ay ginawaran ng P170.6 bilyong public-private partnership contract para i-rehabilitate, gawing moderno, at patakbuhin ang NAIA sa loob ng 15 hanggang 25 taon. Ang kasunduan sa konsesyon ay nilagdaan noong sumunod na buwan, na nagtatakda ng pagkuha sa consortium noong Setyembre 14.
Ang consortium ay binubuo ng San Miguel Holdings Corp., RMM Asian Logistics Inc., RLW Aviation Development Inc., at Incheon International Airport Corp.
Bago ang nasbaing take-over, ang Manila International Airport Authority (MIAA), na kumokontrol sa pangunahing lokal at internasyonal na gateway ng bansa, ay naglabas din noong Pebrero ng notice of public hearing and consultation hinggil sa iminungkahing pagtaas ng mga bayarin at singil sa paggamit ng mga serbisyo nito, pasilidad, at kagamitan.
Ayon sa mga naunang ulat, batay sa panukalang MIAA fees, ang singil sa serbisyo ng pasahero para sa mga lokal na biyahero ay halos doble sa P390 mula sa P200 sa unang taon sa ilalim ng consortium. Ang service charge para sa mga international traveller, sa kabilang banda, ay tataas ng 73 porsyento hanggang P950 mula sa P550.
Ang passenger fees gayundin ang mga iminungkahing pagtaas sa aeronautical at iba pang mga singil ay itinuring ng mga grupo ng aviation bilang hindi makatwiran at hindi kayang bayaran.
Nagbabala sila na ang iminungkahing landing at takeoff fee ng NAIA na sisingilin sa mga airline ay doble kaysa sa Changi Airport ng Singapore at higit sa triple ng iba pang paliparan sa Southeast Asia.
Ang mga pagtaas ay iniulat na humigit-kumulang $2,000 na higit pa kaysa sa mga nakolekta sa paliparan ng Tokyo-Narita, na karaniwang itinuturing na isa sa pinakamahal sa Asya.
Nauna nang nai-post ng MIAA ang iminungkahing binagong iskedyul ng mga bayarin sa opisyal na website nito, ngunit mula noon ay hindi na ito naa-access sa hindi pa rin matukoy na mga dahilan.
Samantala, ang gobyerno ay pumasok sa isang kontrata upang i-rehabilitate at gawing moderno ang mga paliparan sa bansa upang itaas ito sa mga internasyonal na pamantayan at alisin ang reputasyon nito sa pagiging kabilang sa “worst” airports sa mundo.
Ang layunin ay pataasin ang kapasidad ng pasahero ng lahat ng mga terminal sa 60 milyon mula sa kasalukuyang 32 milyon sa isang taon.
Para magawa ito, sinabi ng DOTr na ang consortium, bukod sa iba pa, ay maglalagay ng mga electronic flight strip system, na bahagi ng planong gawing moderno ang mga communications, navigation, at surveillance system para sa air traffic management; isang automated weather observation system at automated terminal information system.
Sa pamamagitan ng mga ito, ang air traffic movement sa NAIA ay tataas mula sa 40 na paggalaw—paglapag at pag-alis—sa 48 bawat oras, sa gayon ay mababawasan ang pagsisikip.
Ang apron control operation ng apat na terminal ay isasama rin sa isang digital remote tower facility. May mga plano na ring i-refurbish ang isa sa mga control tower bilang backup control tower. Jay Reyes
