Parak, 2 suspek utas sa operasyon

CAMP OLIVAS, Pampanga-BILANG sa sinumpaan tungkulin nagbuwis ng buhay ang isang pulis matapos mabaril ng isa dalawang suspek sa buy bust operation na ikinasawi rin ng mga huli, kahapon ng madaling-araw sa bayan ng Orion.

Kinilala ni Brig. Gen. Jose Hidalgo Jr., Regional police director Central Luzon, ang nasawi na si Cpl. Darnel Alfonso habang sugatan ang mga kasamahan nitong sina Maj. Dennis Duran at SSg. Glenn Salac , pawang mga kasapi ng Bataan Provincial Intelligence Unit (PIU).

Kinilala naman ang isa sa mga napatay na suspek na si Mark Anthony Capacia habang inaalam pa ang pagkakakilanlan ng kasama nito.

Sa pinagsamang operasyon ng Bataan Police Intelligence Unit Orion Police Station, Bataan 2nd Provincial Mobile Force Company at Criminal Investigation Detection Group-Bataan,naganap ang buy bust operation dakong 1:00 AM Mayo 23, 2023 sa Purok 8, Barangay Gen. Lim, Orion, Bataan

Inilatag ang buy-bust operations para sa paglabag sa RA 10591 laban sa mga suspek subalit nakatunog ang mga ito na pulis ang kanilang ka-transaksyon.

Nagtangkang tumakas ang mga suspek at pinaputukan ang operatiba na ikinasawi ni Alfonso at ikinasugat ng dalawa nitong kasamahan.

Gumanti naman ng putok ang mga pulis na nagresulta sa pagkamatay ng dalawang suspek.

Narekober sa lugar ng operasyon ang isang Colt .45 caliber pistol na may magazine at naglalaman ng 12 pirasong bala, 1-.45 caliber pistol na may 6 na bala, 1-homemade shotgun 12 gauge na may apat na bala, at isang hand grenade MK2 fragmentation high explosive.

Nagpaabot naman ng pakikiramay ang buong Central Luzon-PNP sa pamilya Alfonso at nag-abot ng tulong pinansyal ganun din binigyan rin ito ng pagkilala bilang pagtupad sa kanyang tungkulin at handang magbuwis ng buhay.

Habang binigyan naman ng parangal ng Medalya ng Sugatang Magiting sina Duran at Salac. Mary Anne Sapico