Patay sa tumumbang balete sa Maynila, umakyat na sa 3; paiimbestigahan ni Abalos

MANILA, Philippines – Sinabi ng Department of the Interior and Local Government (DILG) nitong Biyernes, Mayo 19, na umakyat na sa tatlo ang nasawi sa pagtumba ng puno ng balete sa ilang kabahayan sa Estero de Magdalena sa Recto Avenue, Maynila.

Tumaas naman sa siyam ang mga nasaktan.

Samantala, inatasan na ni DILG Secretary Benhur Abalos Jr. ang Bureau of Fire Protection (BFP) na imbestigahan ang insidente at ibigay sa kanya ang mga rekomendasyon upang maiwasang mangyari ang kahalintulad sa hinaharap.

“Nagbigay na rin ako ng direktiba sa BFP na imbestigahan ang insidente at inaasahan ko na magsasubmit sila ng report at mga rekomendasyon sa mga susunod na araw,” aniya.

Nakiramay naman si Abalos sa pamilya ng mga nasawi.

Matatandaan na nitong Huwebes, Mayo 18, ay tumumba ang malaking puno sa ilang tirahan sa Estero de Magdalena, Recto Avenue sa kasagsagan ng malakas na ulan.

Ayon sa Manila LGU, naghihintay na lamang sana ng relokasyon ang mga residente ngunit naudlot dahil sa pandemya.

Walong pamilya ang naapektuhan ng insidente at pansamantalang tumutuloy sa modular tents sa gilid ng Recto Avenue habang hinihintay pa ang itatalagang ligtas na lugar ng barangay sa kanila. RNT/JGC