Home HOME BANNER STORY PBBM kay Quiboloy: Humarap sa mga pagdinig, magpaliwanag ng panig

PBBM kay Quiboloy: Humarap sa mga pagdinig, magpaliwanag ng panig

Hinimok ni Pangulong Ferdinand “Bongbong” Marcos Jr. ngayong Miyerkules, Pebrero 28, ang pinuno ng Kingdom of Jesus Christ (KOJC) na si Apollo Quiboloy na gamitin ang mga pagdinig sa kongreso upang sagutin ang mga akusasyon na ibinabato laban sa kanya at sa kanyang relihiyosong grupo.

Sa panayam ng mga mamamahayag bago umalis patungong Canberra, Australia para sa isang pagbisita, pinayuhan ni Marcos si Quiboloy na “sabihin ang iyong panig ng kuwento.”

”May pagkakataon siya sa mga pagdinig pareho sa Kamara at sa Senado na sabihin ang kanyang panig ng kuwento. Kaya po sinasabi niya, hindi totoo lahat ‘yan, hindi totoo, walang nangyaring ganiyan, ‘di sabihin niya,” ani Marcos.

Idinagdag ni Marcos na mas mahihirapan si Quiboloy kung siya ay papatawan ng contempt ng Kongreso.

”Kaya ang payo ko sa kanya ay harapin na lang ang pagtatanong sa Kamara at sa Senado. Marinig natin ang kanyang side para malaman natin kung ano ba talagang nangyayari dito,” dagdag pa niya.

Parehong naglabas ng subpoena ang Senado at ang House of Representatives para kay Quiboloy matapos nitong laktawan ang magkahiwalay na pagdinig sa mga umano’y pang-aabuso na iniuugnay sa KOJC gayundin ang mga panawagan na bawiin ang prangkisa ng Swara Sug Media Corporation, ang legal na pangalan ng operating ng Sonshine Media Network International, ang broadcast media arm ng KOJC.

Nauna nang sinabi ni Quiboloy, na itinanggi ang mga akusasyon laban sa kanya, haharap lang siya sa mga korte..

Samantala, hiningi ang kanyang komento sa alegasyon ni Quiboloy na siya at si First Lady Louise ”Liza” Araneta-Marcos ay nakikipagsabwatan sa US government para “tanggalin” siya, sinabi ni Marcos na walang gustong patayin ang lider ng relihiyon.

”Walang gustong mag-assassinate sa kanila. Bakit siya i-assassinate? Bakit may gustong mamatay siya?” giit ng Pangulo. RNT

Previous articleDigong: Wala akong sinabing adik si Bongbong, patayin ako nya’n
Next articleTeves nasa INTERPOL red notice list na