PBBM nakiramay sa pamilya ng 5 Pinoy crew na nawala sa Indian Ocean

MANILA, Philippines – NAGPAABOT ng kanyang pakikiramay si Pangulong Ferdinand Marcos Jr. sa pamilya ng mga Filipino crew members na nasawi matapos tumaob ang isang Chinese fishing vessel sa Indian Ocean noong nakaraang linggo.

“Nakikiramay tayo sa mga pamilya ng mga kababayan nating nasawi sa tumaob na fishing vessel sa Indian Ocean noong ika-16 ng Mayo,” ayon kay Pangulong Marcos sa kanyang tweet.

“Nakaantabay ang ating pamahalaan para sila’y alalayan,” dagdag na wika ng Pangulo.

Sa kabilang dako, nakipag-usap na ang Department of Foreign Affairs sa Department of Migrant Workers para sa repatriation ng mga labi ng limang tripulante ng F/V Lu Peng Yuan Yu 028 na lumubog sa karagatang sakop ng Sri Lanka at bahagi ng Indian Ocean noong Mayo 16.

Kasama ang limang Pinoy sa 39 crew na sakay ng fishing boat at ang 17 Chinese at 17 Indonesian.

Samantala, tiniyak ni DFA spokesperson Teresita Daza na magbibigay ng tulong ang ahensya sa pamilya ng mga tripulanteng Pinoy na nasawi.

Makaraan ay sinabi ng DFA na nakita ng Indian maritime patrol ang tumaob na fishing vessel mga 1,000 kilometro sa timog ng Sri Lanka noong Mayo 18, at walang natagpuang nakaligtas.

Nagdeploy ng 12 vessels ang gobyerno ng Australia, China, India at Sri Lanka at anim na aircraft para magsagawa ng search and rescue ngunit natigil ang operasyon dahil sa masamang panahon.

Ayon pa kay Daza, pagkatapos ng search and rescue operations, noong Mayo 23, nilipat na sa search and recovery ang isinasagawa ng mga awtoridad dahil ilang araw na mula nang lumubog ang barko.

Pagmamay-ari ng Penglai Jinglu Fishery Company, isa sa mga major state-run fishing firm ng China, ang tumaob na barko.

Pinahintulutan itong mangisda ng neon flying squid at Pacific saury, ayon sa North Pacific Fisheries Commission.

Umalis ito sa Cape Town sa South Africa noong Mayo 5 patungong Busan sa South Korea, at huling namataan noong Mayo 10 sa timog-silangan ng Reunion, isang maliit na French island sa Indian Ocean.

Samantala, pinasalamatan naman ni Pangulong Marcos ang Australian at Chinese search and rescue teams.

“We also extend our gratitude to the Australian and Chinese search and rescue teams for conducting extensive operations in spite of the unforgiving weather,” ayon sa Punong Ehekutibo. Kris Jose