PH El Niño Team bubuo ng water conservation program

MANILA, Philippines – KASALUKUYAN na ngayong bumubuo ang National El Niño Team ng iba’t ibang water conservation program na naglalayong pagaanin ang epekto ng nagbabadyang dry spell o tagtuyot sa bansa.

“Water conservation programs (will) be developed and implemented in national government offices,” ang nakasaad sa kalatas ng team kasunod ng lingguhang pulong nito.

Sinabi na ang  water conservation program ay babalangkasin ng  Department of Environment and Natural Resources (DENR).

Tungkulin din nito na tukuyin ang geographically challenged areas na mangangailangan ng augmentation o karagdagan na suplay ng maiinom na tubig.

Sanib-puwersa naman ang DENR at Department of Agriculture (DA) na bantayan ang pagbabawas ng water allocation para sa National Irrigation Administration (NIA) bunsod ng posibleng pagbaba ng  water level sa Angat Dam.

Sa naging pulong nito, idinagdag ang Department of Science and Technology (DOST) bilang bagong member agency ng technical working group ng team.

Ang team, binubuo ng iba’t ibang ahensiya ng pamahalaan ay inatasan na magpalabas ng hakbang para tugunan ang epekto ng El Niño phenomenon.

Binigyang-diin din na ang DA ay inatasan na maghanda ng komprehensibong report ukol sa mitigation measures at interventions at makipag-ugnayan sa Philippine Rice Research Institute para mangalap ng datos hinggil sa  drought-resistant varieties ng bigas. Kris Jose