Sinabi ng Philippine National Police (PNP) nitong Lunes na ang 2,700 body-worn cameras (BWCs) na binili para sa mga pulis sa buong bansa ay gagamitin sa checkpoint operations bilang bahagi ng security measures para sa darating na Barangay at Sangguniang Kabataan Elections (BSKE).
Ang pahayag ay matapos na umarangkada na ang paghahain ng certificate of candidacy (COC) para sa BSKE nitong Lunes at tatakbo hanggang Setyembre 2.
Pinaalalahanan ni PNP chief Gen. Benjamin Acorda Jr. ang mga opisyal ng pulisya na tratuhin ang lahat ng indibidwal nang may lubos na kagandahang-loob at paggalang sa mga checkpoint at magsagawa ng mga inspeksyon sa isang propesyonal at hindi nakakagambalang paraan, ani Maranan.
“Yung ating Chief PNP ay inutusan yung ating mga regional directors na i-supervise directly yung ating mga checkpoints na inilatag natin siyempre sa pangunguna yan ng mga provincial directors and chiefs of police and siguraduhin na yung ating mga pulis na nagko-conduct ng checkpoint ay nandun sa mga lugar na dapat ay maliwanag, meron silang mga marked vehicles, dapat naka proper uniform at sundin to the letter yung ating police operational procedures at siyempre yung pinakamahalaga yung strict observance of human rights at pagiging courteous sa mga passing motorists,” ani Maranan.
Ang pagtatayo ng mga checkpoint ay isinagawa sa ilalim ng Commission on Elections (Comelec) Resolution No. 10924 para epektibong ipatupad ang pagbabawal sa mga baril at iba pang nakamamatay na armas sa loob ng 90 araw na panahon ng halalan mula Agosto 28 hanggang Nobyembre 29.
Ipinagbabawal ng resolusyon ang pagdadala o pag-iingat ng mga baril o iba pang nakamamatay na armas sa mga pampublikong lugar, kabilang ang anumang gusali, kalye, parke, pribadong sasakyan, o pampublikong sasakyan, o kahit na lisensyado na magkaroon o magdala ng pareho, maliban kung pinahintulutan ng Comelec.
Samantala, sinabi ni Maranan na patuloy nilang babantayan ang 27 “area of grave concern” para sa darating na BSKE.
Idinagdag niya na ang mga datos sa mga lugar na ito ay hindi pa napapatunayan ng PNP, kasama ang Comelec, militar at Philippine Coast Guard.
Ang election period para sa Oktubre 30 BSKE ay tatakbo hanggang Nob. 29 habang ang panahon ng kampanya ay itinakda mula Oktubre 19 hanggang 28. RNT
