Power transmission system, pinondohan ng P300B – NGCP

MANILA, Philippines – Umaabot na sa P300 bilyon ang nailalabas ng National Grid Corp. of the Philippines (NGCP) para sa pagpapaganda ng state-owned power grid mula nang maigawad sa kanila ang operasyon at pamamahala nito noong 2009.

“We continue to be hopeful that improvements in all three sectors of the power delivery system are in sync with each other, so that one sector is not made to be the sole or principal solution to challenges in the other sectors,” pahayag ng NGCP.

Ang tinutukoy nito ay ang tatlong power sector na mahalaga upang masiguro ang suplay ng kuryente sa bansa, ang generation, transmission at distribution.

Dagdag pa ng NGCP, nakakumpleto ito ng 56 proyekto sa loob ng 14 na taon mula nang hawakan nito ang “aging transmission system,” ng pamahalaan, kabilang ang P52-billion Mindanao-Visayas Interconnection Project na kamakailan ay nagsimula na sa partial operations.

Ang pahayag na ito ay kasunod ng pagkabahala ng mga senador sa kaugnayan ng China sa power transmission business.

Matatandaang sinabi rin ni Senador JV Ejercito na dapat gawin ng pamahalaan ang lahat ng legal na hakbang para magkaroon ng full Filipino control sa energy transmission system.

Tumugon din ito sa panawagan na suriin muli ang prangkisa nila sa pagsasabing,
“we had faith in the legal process and we will continue to comply with all lawful directives, and pursue our mandate faithfully.”

Nauna nang sinabi ng Department of Energy na magsasagawa ng performance audit sa NGCP ang Energy Regulatory Commission (ERC) kasunod ng malawakang blackout na naranasan sa Luzon grid noong nakaraang linggo.

Ayon kay Energy Undersecretary Rowena Guevara, nakipagkita na ang ahensya sa ERC para pag-usapan ang audit, at sinabing tututukan nito ang Transmission Development Plan ng NGCP.

“The franchise was awarded by Congress, and only Congress has the power to revoke that. We’ll submit the report, but it won’t contain any color. We just state the facts,” sinabi ni Guevara.

Para naman sa NGCP, sinabi nito na mas marami pa silang makukumpletong proyekto ngayong taon na makatutulong upang ibsan ang krisis sa kuryente kasunod ng lumalakas na demand at numinipis na suplay nito. RNT/JGC