Pulis na sangkot sa 990-kg shabu haul, nagkalat sa Senado; ilang senador nanggigil!

MANILA, Philippines – Isinailalim sa contempt ng Senate Committee on Public Order and Dangerous Drugs ang pulis na sangkot sa 990-kilogram shabu haul sa Maynila, matapos itong bigong makapagbigay ng phone number ng kanyang informant.

Kasabay ng pagdinig ng komite, tinanong ni Senador Ronald “Bato” dela Rosa si PNP Drug Enforcement Group (PDEG) Special Operations Unit 4A arresting team head Captain Jonathan Sosongco na ibigay ang numero ng kanyang informant, makaraang itanggi ng ilang pulis na sangkot sa operasyon na tumanggap sila ng tip sa 990 kilo ng shabu.

Ani Sosongco, wala na ang teleponong ginamit niya upang makipag-usap sa informant.

“Your honor, wala na po ‘yung cellphone ko na gamit po…’Yung cellphone na ginagamit sa trabaho hindi naman ito ang ginagamit. Wala na, your honor,” sinabi niya.

Sa puntong ito, hiniling ni Dela Rosa kay Senador Robin Padilla na gumawa ng mosyon upang i-cite for contempt si Sosongco.

“Sobra na itong panloloko na ginagawa sa atin dito. Nauubos na ‘yung oras natin dito,” anang Senador.

Sinuportahan naman ni Padilla ang panawagan ni Dela Rosa, at kagyat inaprubahan ang mosyon.

“Sobrang magsinungaling ‘to. Tinatawagan mo tapos wala kang number? Ano ba? Ganon ka na lang manloko sa committee na ito? Dalhin yan sa baba,” ani Dela Rosa.

Kasalukuyang iniimbestigahan sa Senado ang isyu ng pagkumpiska ng mga awtoridad sa P6.7 bilyon halaga ng shabu sa serye ng anti-drug operations sa Maynila kung saan di-umano ay itinago ng ilang pulis ang nasa 42 kilo ng mga nakuhang illegal na droga.

Inaresto naman ng mga awtoridad si ngayon ay dismissed Police Master Sergeant Rodolfo Mayo Jr. kaugnay nito.

Maliban dito, nagkaroon din umano ng cover-up sa nangyaring insidente, kung kaya’t inirekomenda ang pagsasampa ng kasong kriminal at administratibo laban sa 49 PNP officials at personnel. RNT/JGC