Puting sibuyas aangkatin ng Pinas

MANILA, Philippines – Inaasahan nang maglalabas ng mga order para sa importasyon ng puting sibuyas sa loob ng buwang ito bilang bahagi ng pagsisikap ng gobyerno na matiyak ang sapat na suplay sa merkado, ayon sa Department of Agriculture (DA).

Sa isang panayam sa mga mamamahayag, sinabi ni DA Assistant Secretary Rex Estoperez na kasalukuyang nag-uusap sila ng mga stakeholder upang tiyakin ang eksaktong bilang, pero binanggit niya na ang unang volume ay magiging 8,800 metriko tonelada.

“Ito ay mga ballpark figures. Ang konsumo ay humigit-kumulang na 4,400 metriko tonelada [kada buwan] kaya kung [mag-import tayo para sa] dalawang buwan, iyan ang 8,800 metriko tonelada na tinitingnan namin ngayon,” aniya.

Ipinaliwanag ni Estoperez na ang karamihan sa unang volume na ipapasok ay ilalaan sa mga institusyonal na mga mamimili.

Batay sa datos mula sa Agribusiness and Marketing Assistance (AMAS) ng DA, ang retail presyo ng puting sibuyas sa National Capital Region (NCR) ay kasalukuyang nasa PHP160 hanggang PHP200 bawat kilogramo (kg), na malaki kumpara sa PHP90 hanggang PHP150/kg na naitala noong Abril.

Sinabi ni Estoperez na pinagsisikapan ng DA na hindi na muling tumaas ang presyo ng sibuyas na umaabot sa PHP600 hanggang PHP700/kg.

Bukod sa puting sibuyas, sinabi ni Estoperez na kanilang ini-aaral kung may pangangailangan rin na mag-import ng pulang sibuyas. RNT