Sagad na lakas maaabot ng bagyong Mawar sa susunod na 24 oras – PAGASA

MANILA, Philippines – Bahagyang lumakas pa ang super typhoon Mawar nitong Biyernes ng umaga, Mayo 26 habang kumikilos pa-kanluran sa Philippine Sea.

Sa 11 a.m. advisory ng PAGASA, taglay ng super typhoon Mawar ang lakas ng hangin na 215 kilometro kada oras malapit sa gitna at pagbugso na aabot sa 260 kilometro kada oras.

Aabot ng hanggang 550 kilometro ang sakop ng bagyong Mawar na may malakas na hangin.

Ayon sa PAGASA, inaasahan na maaabot ng super typhoon ang peak intensity nito sa loob ng 24 na oras at inaasahang papasok sa Philippine Area of Responsibility Biyernes ng gabi o Sabado ng madaling araw.

Sa oras na pumasok ito ng PAR ay tatawagin na itong Betty.

Huling namataan ang sentro ng bagyong Mawar sa layong 1,705 kilometro silangan ng southeastern Luzon at kumikilos pa-kanluran sa bilis na 20 kilometro kada oras.

Posible rin anang PAGASA ang pagtataas ng wind signals pagsapit ng Sabado ng gabi. RNT/JGC