Salt industry nais buhayin sa Kamara

MANILA, Philippines – Pasado na sa ikalawang pagbasa sa House of Representatives ang Philippine Salt Industry Development Act.

Ang nasabing panukala na nakapaloob sa House Bill 8278 ay isa sa priority measures ni Pangulong Ferdinand Marcos kung saan layon nitong tutukan ang produksyon ng asin sa bansa.

Sa kanyang sponsorship bill sinabi ni Quezon Rep Wilfrido Mark Enverga na nakalulungkot na nakadepende ang bansa sa supply ng asin sa ibang bansa gayong ang Pilipinas ay mayaman dito.

“Challenges exist in the local salt industry, hence, immediate steps must be taken to address them. We need to save our sinking salt industry,” paliwanag ni Enverga.

Nakapaloib sa panukala ang pagbuo ng Philippine Salt Industry Development Roadmap at Philippine Salt Industry Development Council kung saan aatasan din ang Department of Agriculture (DA) at Bureau of Fisheries and Aquatic Resources (BFAR) na syang manguna sa pagbuhay sa industriya.

Kabilang din sa panukala ang paglipat ng salt farms sa ilalim ng DA-BFAR sa halip na sa Department of Environment and Natural Resources.

Inaasahan naman na bago ang pagtatapos ng regular session ng Kamara sa June 2 ay maipapasa ang panukala sa ikatlo at huling pagbasa. Gail Mendoza