MANILA, Philippines – Nagsagawa na ng imbestigasyon ang Maritime Industry Authority (MARINA) sa ilan mismong miyembro nito para sa posibleng administratibong pananagutan sa insidente ng MT Princess Empress batay sa ulat ng fact-finding team.
Ang ulat ay ipinasa sa Department of Transportation (DOTr) at sa MARINA Anti-Graft and Corruption Committee.
Ito ay kasunod ng pagkansela ng Certificate of Public Convenience (CPC) ng RDC Reield Marine Services, Inc. (RDC), ang kumpanya ng barko na nagmamay-ari at nagpapatakbo ng MT Princess Empress, ang tangker na nagdulot ng malaking oil spill sa Oriental Mindoro at kalapit na lugar.
Sa isang media briefing noong Biyernes, sinabi ni MARINA spokesperson at Legal Service Director Sharon Aledo na kasalukuyang iniimbestigahan ng maritime authority ang mga kawani para sa alegasyon ng administratibong paglabag sa pag-iisyu ng kaugnay na statutory certificates sa MT Princess Empress.
“Titignan natin ang mga alegadong paglabag, mula sa konstruksiyon hanggang sa pag-iisyu ng mga statutory certificates, kasama ang registration at safety certificates at ito ay susunod sa proseso,” ani Aledo.
Idinagdag ng ahensya na kung hindi mag-apela ang RDC sa loob ng 15 araw mula sa pagkansela noong Mayo 11, magiging final at maaari nang ipatupad ang desisyon, ibig sabihin “ang pagkansela ng CPC ay magiging final,” aniya.
Hindi pa rin maaring mag-operate ang kumpanya ng barko dahil ang cease-and-desist order ay patuloy na ipinatutupad, sabi ni Aledo. Dagdag pa niya, bukod sa pagkansela ng CPC, ang RDC ay mapapatawan ng multang ₱100,000 kapag ang desisyon ay final at ipinatutupad na, dahil sa operasyon na walang angkop na awtoridad.
Ang imbestigasyon ng MARINA ay sumusunod sa direktiba ni Transportation Secretary Jaime Bautista na may pananagutan, sa polisiya ng DOTr na walang toleransiya sa mga shortcut, kawalan ng kahalagahan, at paglabag sa mga patakaran. RNT
