MASAYANG nagpalitrato si Sen. Bong Go sa mga school principal matapos siyang dumalo sa 41st Principals Training and Development Program Cum National Board Conference (PTDP-NBC) noong Huwebes sa Puerto Princesa, Palawan.
MANILA, Philippines – Dumalo si Senator Christopher “Bong” Go, miyembro ng Senate committee on basic education, sa 41st Principals Training and Development Program Cum National Board Conference (PTDP-NBC) noong Huwebes sa Puerto Princesa, Palawan.
Ang event, may temang “Reskilling and Upskilling the School Heads on MATATAG Agenda,” ay dinaluhan ng humigit-kumulang 8,000 elementary school principals sa buong bansa. Tumanggap sila ng mga token of appreciation mula kay Sen. Go.
“Sa lahat ng mga principal na naririto, saludo po ako sa inyong walang sawang pagsusumikap at dedikasyon. Kayo po ang tunay na lider ng ating mga paaralan, at sa kabila ng mga hamon at pagsubok, patuloy ninyong inialay ang inyong buong puso upang masiguro na makapagbibigay ng de-kalidad na edukasyon para sa ating mga kabataan. Kayo ang nagsisilbing haligi ng ating mga paaralan, at ang inyong pangunguna ay inspirasyon sa ating lahat,” ang pagbati ni Go sa mga dumalo.
Binigyang-diin ni Go ang mahalagang papel ng mga punong-guro sa educational ecosystem.
“Ang mga punong-guro ay ang gabay na ilaw ng kanilang mga paaralan, na humahantong hindi lamang sa mga guro, kundi sa buong komunidad ng paaralan patungo sa kahusayan,” ani Go.
Aniya, napakalaki ng responsibilidad ng mga punong-guro sa paghubog ng kinabukasan ng edukasyon sa Pilipinas.
Kinilala ng senador ang kakaibang hamon na kinakaharap ng mga pinuno ng paaralan, lalo noong panahon ng pandemya ng COVID-19.
“’Yung transition niyo from face-to-face, to online, to face-to-face ulit, alam ko po ‘yung pinagdaanan niyo (at) napakahirap noong panahon na ‘yun. Kaya salamat po sa inyong serbisyo, salamat po sa inyong pasensya,” idiniin ni Go.
Muling binanggit ni Go ang kanyang pangako sa sektor ng edukasyon at idiniin ang kanyang paniniwala sa kabataan bilang pundasyon ng mga susunod na henerasyon.
Kabilang sa mga hakbang ni Go para sa pagpapabuti ng edukasyon bilang co-author at co-sponsor ay ang Republic Act No. 11984, o ang “No Permit, No Exam Prohibition Act”. Tinitiyak ng batas na ito na maaaring makakuha ng exam ang mga mag-aaral anuman ang mga hadlang sa pananalapi.
Kasama rin siya sa may akda at nag-sponsor ng isinabatas kamakailan na RA 11997, o ang “Kabalikat sa Pagtuturo Act” na naglalayong dagdagan ang allowance sa pagtuturo ng mga guro sa pampublikong paaralan.
Binanggit din niya na noong administrasyon ni dating Pangulong Rodrigo Duterte, ang RA 10931, na kilala bilang Universal Access to Quality Tertiary Education Act, ay isinabatas. Malaki ang naitutulong nito sa mga mahihirap na estudyante sa pamamagitan ng pagbibigay ng libreng edukasyon sa mga lokal na kolehiyo, unibersidad, at technical vocation na pinamamahalaan ng estado.
Batay sa mga nagawa ng RA 10931, iniakda at inisponsoran ni Sen. Go ang Senate Bill No. 1360, na layong palawakin ang saklaw ng Tertiary Education Subsidy (TES). RNT
