Task Force El Niño binuo ng Makati City

Inihayag ni Makati City Mayor Abby Binay na bumuo ng task force ang lungsod bilang preparasyon sa pagdating ng El Niño phenomenon at ang magiging epekto nito.

Ayon kay Binay, ang binuong Task Force ENSO (El Niño Southern Oscil­lation) ang siyang mag-uugnay sa lokal na pamahalaan sa iba’t-ibang grupo upang amsiguro ang tuloy-tuloy na ay ng tubig at elektrisidad sa mga residente ng lungsod bilang paghahanda sa epekto na idudulot ng El Niño ng hanggang unang tatlong buwan ng susunod na taong 2024.

“Nakipag-meeting tayo sa mga concessionaires natin ng tubig at ilaw sa Makati at pinaghanda sila ng mga contingency measures para sa inaasahang kakulangan ng supply sa tubig at kuryente. Naghanda na rin ang mga department sa City Hall na naghahatid ng mga social services at emergency response para sa ano mang krisis o emergency na maaaring mangyari,” ani Binay.

“Sisiguruhin ng Task Force ENSO na ligtas ang bawat isa at patuloy na naihahatid ang basic social services sa mga panahong nasa El Niño ang bansa. Halimbawa, hindi magkakaroon ng power interruption at kawalan ng suplay ng tubig sa mga ospital at pangunahing opisina sa Makati City Hall,” dagdag pa ni Binay.

Paliwanag ni Binay, naglatag na rin ng palno ang mga water concessionaires upang masiguro ang patuloy na suplay ng tubig sa bawat kabahayann at establisimiyento sa lungsod.

Bukod sa mga deep wells at alternatibong pagkukuhanan ng tubig ay nagbukas na rin ang Manila Water at Maynilad ng kani-kanilang water treatment plants na magsusuplay ng tubig kung sakaling aabot sa pinakamababa ang lebel ng nakareserbang tubig.

Nagsasagawa rin ang dalawang water concessionaires ng kanilang regular na inspeksyon at pagkukumpuni ng kanilang mga nasira at may tagas na tubo at kung sakali mang magkaroon ng water interruption ay ipapalabas nila ang kanilang water tankers sa mga apektadong barangay sa Makati upang mabigyan ang mga residente ng malinis na tubig.

Samantala, sinabi naman ng Meralco na maaari silang magpatupad ng rotational brownouts kung sakali man na numipis ang suplay ng elektrisidad.

“Naka-antabay na ang ating Disaster Risk Reduction and Management Council (DRRMC) na umagapay kung magkakaroon ng water rationing sa mga piling lugar. Bukod pa dito ay maghahanda ng generators para sa mga kritikal na pasilidad o opisina para sa tuloy-tuloy na paghahatid ng serbisyo sa lahat,” paliwanang ni Binay.

Bilang pakikiisa sa anumang epektong idudulot ng El Niño ay hinimok ni Binay ang Makatizens na gawin ng mga residente ng lungsod ang nararapat na pamamaraan sa paggamit ng tubig at elektrisidad. James I. Catapusan